Wolfsburg khelmualah Real tan fiahna

Zanin dar 12:15 hian Real Madrid-in Champions League quarterfinal an khel dawn a, an lenluhna tur hi Wolfsburg khelmual a ni. Team pahnih hi tun hmain an la inhmachhawn ngai lo a, zanin hi an intawn hmasak ber tur a ni.

Real hi La Liga lama nomawi an beiseina chhi nung thar tura Barcelona hneh zo hlim an ni a, an phur vanglai tak a nih avangin hmachhawn an chakawm loh ang.

Real coach Zinedine Zidane-a'n coach a nih hnua El Clasico-a a match hmasa berah hnehna a chang nghal a, Nou Camp-ah Barcelona chu 2-1 in an hneh. Player anga a ropuina ramah Zidane-a'n fak a hlawh hle.

Mahse, French manager hian Cham-pions League semifinal lut tura club tenau zawka ngaih Wolfsburg a paltlang thei lo a nih chuan Nou Camp-a an hnehna chanin theihnghilh a hlawh chhunzawm nghal ang - Real coach thar hian hei hi thlentir a duhin a rinawm lo.

Wolfsburg midfielder Julian Draxler chuan Real Madrid hneh turin thil mak ni loin an khelh ṭhat a pawimawh thu a sawi a, Champions League aṭanga Real an hnawtchhuak thei a nih chuan mumang rama cheng ang mai an nih tur thu leh football-ah chuan engpawh a thlen theih thu a sawi - Wolfsburg hi mumang ramah an cheng dawn nge an mumang aṭangin an ṭhangharh dawn tih hi zanin an inkhel turin a hril thui hle ang.

Wolfsburg dinhmun

Real Madrid tan tun hi Wolfsburg khelmuala zin chhuah a hun ber lai a ni hialin a rinawm - German club hian an league match hnuhnung 15-ah vawi thum chiah hnehna an chang thei a, vawi sarih tlawmin vawi nga an khingpuite an inhnehtawkpui thung.

Spanish club tana hriat nuam lo tur erawh Wolfsburg-in Champions League-a an match riatah vawi ruk hnehna changin vawi hnih chiah an tlawm a, an khelmualah an tlawm miah lo thung - heng zinga match thumah hian goal an chhuah lo.

Mahse, German club-in an tlarhnung player pawimawh zingah Naldo leh Sebastian Jung-te chu hliam vangin an chhawr thei dawn lo a, Real tlarhma tan hna a awlsam sawt ang.

Wolfsburg striker Bas Dost chu hliam vangin a inlan a beiseiawm loh a, player pawimawh Julian Draxler leh Max Kruse-te'n an hliam vangin ngai la awh lo mah se coach Dieter Hecking-a'n a chhawr luih a rinawm.

Real ve thung

Spanish club player zingah Rafael Varane chiah inhliam a awm a, Real tlarhnung laiah Pepe leh Sergio Ramos-te an inkawp leh ngeiin a rinawm.

El Clasico-a Lionel Messi dah niltu defensive midfielder Casemiro-a'n inkhel bul a ṭan leh beisei a ni a, Real player langsar karah Brazilian midfiel-der hi player ṭangkai a ni.

Real tlarhma tan BBC tia hminglem an vuah Gareth Bale, Karim Benzema leh Cristiano Ronaldo-te innghahna ber an ni leh dawn a, tun season Champions League-a Real-in goal 23 lai an khung tawhah anni pathum hian an thawhhlawk hle.