Shaw-a'n training a zawm

Manchester United defender Luke Shaw chuan a inhliam aṭanga thla sarih liam hnuah Thawhṭanni khan a vawi khat nan training a nei. Kum 20-a upa England left back hian nikum September thla khan Champions League-a PSV an hmachhawn ṭumin Hector Moreno tlawh vangin a ngal ruh a ti tliak a, season tluan chawl tura ngaih a ni.

United-a Shaw khelh-pui Juan Mata chuan Instagram-ah England defender nena an training-na thlalak hi a pho chhuak a, Spain midfielder chuan, "Ka ṭhianpa Luke Shaw chu a tlan leh thei tawh a, match khelh theih hun a hnaih leh sawt," tiin a ziak.

England manager Roy Hodgson chuan Euro 2016 khel turin Shaw hi a la beisei a, May 12-a squad a puan chian hmain a fitness test phalsak turin United a ngen. Hetihlai hian United manager Louis van Gaal chuan Euro 2016 hmain Shaw hi club tana a khelh theih a beisei loh thu a sawi thung.

Manchester United-in chanchinṭha dang an nei a, defender Phil Jones chu inhliam vanga thla thum chhung a inlan loh hnuah Thawhṭanni khan United U21 leh Chelsea U21 te 1-1 a an inhnehtawk ṭumin minute 75 chhung a khel a, Pathiannia Tottenham Hotspurs an tlawh hunah a inlan theih tawh beisei a ni.