Chelsea tan Conte hi awmzia a awm lo - Sutton

Premier League-a Blackburn Rovers champion puitu striker Chris Sutton chuan Chelsea manager thar Antonio Conte chu an ban tak Portuguese manager Jose Mourinho nen an zia a inan viau avangin Blues tan danglamna a thlen phah a rin loh thu a sawi.

Blues striker hlui Sutton chuan, "Mourinho hnuaiah khan senior player-te'n harsatna an tawk a nih chuan Conte hnuaiah pawh an buai tho ang. Italian manager hi Chelsea-ah rawn kal se, rum takin rorel nghal se awmzia a awm in ring a mi?," tiin Juventus manager hlui chungah beisei a nei sang lo.

Kum 46-a upa Conte hian Euro 2016 zawh thleng Italy team a enkawl ang a, hemi zawh hian Stamford Bridge a zawm nghal ang. Sutton-a'n Italian manager chungah rinna nghat ngam lo mah se Blues player hlui pahnih Andy Townsend leh Pat Nevin te erawhin Chelsea-in Conte an la lut chu an tifuhah an ngai thung.

Republic of Ireland midfielder hlui Townsend chuan, "Conte hi Mourinho ṭhat lai ber nen khan a danglam tam lo ang. Jose khan Stamford Bridge a zawm tirh khan player ngaihven a hlawh avangin a hnuaia khelh kha player-te khan nuam an ti a ni," tiin Italian manager chuan player-te a tihphur theih a rinthu a sawi.

Scotland winger hlui Pat Nevin chuan, "Mi tam takin Conte hi kaldan phung pakhat chauh nei angin an sawi a, amaherawhchu an sawi ang hi a ni lo. Conte hi a ṭul dan a zira inthlak danglam thei manager a ni," tiin a fak hle.

Tu nge Conte?

Season thar aṭanga Chelsea enkawltu tur Conte hian Italy a enkawl hmain Juventus kum thum a enkawl a, Serie A-ah vawi thum a champion a, Serie A Coach of the Year-ah thlan a ni vek bawk. Conte hma hian Gianluca Vialli, Claudio Ranieri, Carlo Ancelotti leh Roberto Di Matteo te'n Chelsea hi an enkawl tawh a, Juventus manager hlui hi Chelsea manager zinga Italian pangana a ni.

Juventus a enkawl hma hian Conte-a'n club pali Arezzo, Bari, Atalanta leh Siena te a enkawl tawh bawk avangin tawnhriat a nei ṭha tawh hle. Hei chauh hi a ni lo, a inkhelh hun laiin Conte hi player thawkrim leh team kaihruaitu ṭha a ni. Juventus-ah a vanglai hun hmangin Serie A-ah vawi nga a champion bakah UEFA Champions League nomawi a chawi bawk. Conte hi Italy tan vawi 20 chauh inlan mah se World Cup 1994 leh Euro 2000 a pahnihna an nih ṭum khan squad-ah a tel ve ve a, player vantlang chunglam a ni.

Juventus midfielder hlui Andrea Pirlo chuan, "Kan chak ṭum pawh hian Conte hian a thil hmuh ang chu dressing room bangah a vawm a, tui bottle hi chu chiang sa a ni. A ṭawngkam hriat nuam lo tak chuan kan thluak kawngka a rawn su hawng a, kan taksa chhungah a ṭawngkam chu a thamral ṭhin," tiin Conte rorum zia chu ama chanchin ziahna lehkhabuah a tarlang.

Manchester City manager hlui Roberto Mancini chuan, "Manager tan league dang daih a intah luh hi a harsa a, Conte pawh hian a bul ṭantirh chuan harsatna a tawk ang. Premier League a hriat chian vat a ṭul bakah a insiamrem theih vat a ṭul bawk ang," tiin awlsam taka bul a ṭan bik a rin loh thu a sawi.

Italian manager hian season thar aṭangin Chelsea a enkawl dawn a, Spanish manager Pep Guardiola-a'n Manchester City a zawm bawk dawn. Premier League season thar a thlen meuh chuan Manchester United-in manager thar an neih a rinawm a, Arsenal lamin ṭum dang ang thoin manager Arsene Wenger hnuaiah nomawi chawi an duh tawh ang a, Liverpool manager Jurgen Klopp-a'n pressure nasa zawk a hmachhawn dawn a, champion tura inum mek Leicester leh Tottenham Hotspurs te an lo awm zel bawk avangin manager zingah daih rei lo deuh chu an awm leh dawn niin a lang.