CYMA Cricket Tournament 2016 Sihphir-in Mission Veng North an hneh

Inter Branch YMA Cricket Tournament 2016 chu nimin khan khelh
ṭan a ni a, inkhel hmasa berah Sihphir Branch YMA chuan wicket rukin Mission Veng North Branch YMA an hneh.

Republic Veng khel-muala inkhelah bat hmasa zawk Mission Veng North-in over 20-ah run 97 siamin mi paruk an hloh a, run 34 siamtu Joe R.Z. Thanga chu run siam hnem ber a ni.

Sihphir bolwer zingah Zarzoliana leh Vanneihtluanga ten an khel ṭha a, wicket hnih ve ve an la.

Sihphir bat hun a thleng a, over 15.2-ah awlsam taka an target umphain run 98 an siam a, run siam hnem ber Laltlansanga chuan run 39 siamin Sihphir chakna hnar a ni.

Inelna hi vawiinah Republic Veng khel-mualah neih chhunzawm a ni ang a, inkhel pahnih a awm ang. Zing dar 9:00-ah Armed Veng Branch YMA leh Bawngkawn Branch YMA an inkhel ang a, chawhnu dar 12:00-ah Dinthar Branch YMA leh Maubawk Branch YMA an inkhel ve leh dawn bawk a ni.