US Open aṭangin Halep a inhnukdawk

Hmeichhe tennis world number 2 Simona Halep chu US Open-ah a inlan dawn lo. Romanian nula hian inkhelh ngei duh mah se a hriselna dinhmun a ngai pawimawh a, coronavirus hluarna hmuna zin luh a duh rih lo.

US Open hi August 31 aṭangin New York khawpuiah a hmuna entu awm loin khelh a ni dawn, nimin tlai thleng khan hmeichhe ranking sang zual 10 zinga paruk an inhnukdawk tawh - an zingah hian champion lai Bianca Andreescu pawh a tel.

Halep chuan, "Thil thlen dan leh thleng theite kawng hrang hrangin ka ngaihtuah a, a tawpa ka thutlukna chu New York khawpuiah US Open khel turin ka kal lo ang tih hi a ni. A hmasa ber atan chuan hriselna hi ngaih pawimawh a ngai.

"United States Tennis Association lamin player leh hnathawkte him nan theihtawp an chhuah tih ka hria, an hnathawh pawh ka zahsak hle. US Open khel tur leh inhnamhnawih zawng zawngte duhsakna sang ber ka hlan," tiin amah inlan thei dawn lo mah se duhsakna a hlan.

Halep hma hian world number 1 Asheligh Barty a inhnukdawk tawh a, Romanina nula hi inkhel se chuan seeded pakhatna a ni ang - mahse Barty hnung zui a thlang ta zawk. Player dang Elina Svitolina (5), Bianca Andreescu (6), Kiki Bertens (7) leh Belinda Becic (8) te pawh an inlan dawn lo.

Kum 28 mi Halep hi kar hmasaa khelh zawh tak Prague Open-ah inlanin a champion a, WTA title 21 a la tling ta chiah. Tunah chuan September thla chawhnu lama khelh tur French Open lam hawiin inbuatsaihna a nei chhunzawm ang.

Player ṭhenkhat an inhnuhdawh lai hian American star Serena Williams, 2018 champion Naomi Osaka, Australian Open champion Sofia Kenin leh world number 3 Karolina Pliskova te chuan inlan ngei an la tum thung a ni.