Dutch Grand Prix an ṭhulh fel

Covid-19 buaina chuan ziaawm lam a pan hleithei lo, Formula 1 2020 Dutch Grand Prix chu hripui leng vang hian a hun sawn a nih zet hnuah ṭhulh fel a nih thu 

an puang.

Kum 1985 hnua a vawi khat nan Dutch GP hi neih leh an tum a, ruahman dan hmasa berah chuan May 3-ah tlan tur a ni. Mahse, Netherlands hi hri leng tamna hmun a ni a, an rama football inelna sang pawh champion awm loin an titawp tawh.

Dutch Grand Prix sports director Jan Lammers chuan, "Intlansiak neih ngei kan tum, kum 35 hnua intlansiak neih leh hi kan chakin kan nghakhlel takzet. Fans beiseina tih thlawn kan duh lo a, a tawp thlengin theihtawp kan chhuah.

"Mahse hripui hian zah a ngai duh rih si lo, ram pumah harsatna a thlen mek zel si; nghakhlel taka kan thir chu kumin atan chuan ui tak chunga mangṭha a ngai rih ta zawk a ni," tiin a sawi.

March thlatir lam khan F1 inelna season hi ṭan tum a ni a, amaherawhchu coronavirus vangin tun thlengin an la ṭan thei lo. Intlansiak thuneitu lam chuan world championship pangngai neih theih an la beisei reng thung.

British Grand Prix an tlanna Silverstone tlankawngah kumin hian intlansiak pahnih neih an beisei. Mahse UK sorkarin inkharkhipna a kalpui danah ram dang mi an rama lutte chu ni 14 chhung khung hran phawt an ngai.

Team ṭhenkhat chuan intlansiak hma a ni 14 inkhunghran hmasak hi buaithlak an ti a, infiamna lamah inkharkhipna hi an thlahdul deuh a nih loh chuan Silverstone-ah hian inelna an nei thei dawn ngei em tih pawh a la chiang chuang lo.

Formula 1 world championship pangngai nei tur chuan season khat chhungin a tlem berah intlansiak pariat tal an hmachhawn a ngai.