June 17-ah Premier League khelh ṭan tum

Premier League ngainatute tan chanchin ṭha hriat tur a awm ta. June 17, 2020 hian khawvela football league ngainat hlawh ber khelh ṭan turin ruahmanna an siam a, United Kingdom sorkarin an pawmpui a nih chuan ni 19 chiah nghah a ngai tawh dawn tihna a ni.

Premier League-ah match 92 khelh tur a la awm a, club paliin match khatin an la khel tlem. Manchester City vs Arsenal leh Aston Villa vs Sheffield United te chu club palite chu an ni a, inkhel hmuhnawm bik nen bul an ṭan dawn tihna a ni.

Inkhel zawng zawng hi entu awm loa khelh a ni dawn a, inelna hi July 25-a tawp turin club-ten an remti niin an sawi.

Premier League chief executive Richard Masters chuan, "Premier League leh kan club te hian min thlawp tlattu ṭantu kan nei hi kan inchhuang hle. Keini pawhin mipui tana inkhel hmuhnawm chhawp chhuah kan duh a, in lam aṭanga a tam thei ang berin an en theih nan ruahmanna kan siam ang," tiin a sawi.

Premier League hi March 13 aṭang khan Covid-19 vangin khelh chhunzawm theih a ni lo a, Leicester City-in Aston Villa 4-0 a an hneh chu match hnung ber a ni. Inelna 

ṭan tur ruahmanna siam chhoh a ni a, club staff leh player mi 2,752 zet Covid-19 test neih a ni tawh a, mi 12 an positive.