Neuer aia De Gea thlangtu United

Sir Alex Ferguson chuan Manchester United a enkawl lai khan German keeper ṭha Manuel Neuer lak theihna hun ṭha nei mah se Spanish rawlthar keeper David de Gea chu goalkeeper coach Eric Steele thutlukna vanga an thlan zawk thu a sawi.

February 2011-ah Dutch keeper Van der Sar chuan season tawpah inkhelh a chawlhsan tur thu a puang a, United-in a thlakna an zawng.

Scottish manager Ferguson chuan, "Eric Steele chuan hun rei tak David de Gea hi a lo zirchiang tawh a, hetihlai hian Schalke tana cheṭha Neuer chuan mit a la viau bawk. Khatih hunlai khan Schalke kha Neuer lak tumin bia ilang chuan an lawm khawp ang," tiin tuna Bayern Munich keeper Neuer chu lak theih mai a nih thu a sawi.

United manager hlui Ferguson chuan sawi chhunzawmin, "Kan buaina chu Eric-a a ni. Kei chuan Eric-a bulah, 'Neuer hi a thiam tluantling a, a puitling tawh a, a lian ṭha bawk' tiin ka hrilh. Amaherawhchu Eric-a chu a ṭanna ngaiah a ṭang tlat a, ka thusawi min ṭawmpui mah se kum thum hnuah chuan De Gea a ṭhat zawk tur thu min hrilh. Tichuan Eric nen chuan Valencia-in Atletico an mikhual ṭum chu kan thlir a - a inrintawkna te, a inthazona te, a ṭuan ranna te chu a sawi ang chiahin a dik. Eric hian a chhungte a lo hmin vek tawh a, chuvangin a chungah rinna ka nghah ngam a ṭul. Tun hnua ka ngaihtuah let hian Eric-a thusawi hi a dik avangin a thu ka lo zawm kha ka lawm," tiin De Gea an thlang chu an tihsual loh thu a sawi.

Manchester United hian kum 2011 nipui lai khan pound maktaduai 20-in kum 20-a upa De Gea an la lut a, an thlan loh zawk German keeper Neuer chuan 2014 FIFA World Cup-ah an ram a champion pui thung.