Suarez ropui zanah Torres vanduai

Champions League quarterfinal first leg khelh ṭan a ni a, Luis Sua­rez goal hnih khung hmangin Bar­celona chuan Nou Camp-ah an mikhual Atletico Madrid 2-1 in an hneh.

Thawhlehni zan inkhela langsar ber chu Suarez ni mah se sawi hlawh ber erawh goal khat a khung hnu lawka hnawhchhuah Fernando Torres a ni. Karleh Nilaini zan khian Vicente Calderon-ah second leg khelh tur niin semifinal lut tur chinfel a ni ang.

Atletico tan hian Torres chuan minute 25-naah Koke hnen aṭanga a ball hmuh chu Barca keeper Marc-Andre ter Stegen dan theih loh turin chiang zetin a khung a, mahse minute 35-na lekah Torres hi hnawhchhuah a ni.

Player 10 a khel Atletico tan Barcelona an ṭha lutuk mah mah a, ball possession 75% zet chang chungin Suarez chuan second half minute 63 leh 74-naah goal a khung a, Catalan club hi semifinal lut turin an dinhmun a ṭha zawk.

Barca tana goal khungtu Uruguay international hian first half-ah Atletico right-back Juanfran a pet vangin hrem tura ngaih ni mah se hrem a pumpelh hlauh a, a vannei hle.

Lionel Messi-a'n a senior ca^­reer-a goal 500-na khung tling turin a la nghah leh rih a ngai dawn a, goal 499 khung tawh Messi hian Atletico lakah goal khungna hun ṭha nei mah se a chhawr ṭangkai thei lo.

Nou Camp-ah hian UEFA ngen­na vangin Barcelona leh Atletico Madrid te chuan 'away kits' an ha ve ve a, hei hi team pahnih jersey a in an em avanga refree-te leh entu lamin awlsam zawka an hriat hran theih nan a tih a ni.

Torres a zuih

Kum 32-upa Torres hian a hma­ngaih hmasa Atletico Madrid chhuahsanin Liverpool leh Chel­sea-ah hun a hman hnuah a nau­pan lai aṭanga a chenchilh Atletico-ah bawk a kir leh. A hun hmasa lam hian match 214 a khelh aṭangin goal 82 khung mah se beisei angin goal a khung pur pur tawh lo.

Barca lakah inelna hrang hranga a goal 11-na khung mah se goal a khung hnu lawkah Toress hi Neymar laka a foul avangin yellow card pek a ni a, minute 35-naah midfielder Sergio Busquets ball chhuksak a tumna lamah a che mawi lo deuh nia ngaiin a vawi hnih nan yellow card pek niin hnawhchhuah zui a ni.

Torres hnawtchhuaktu refree Felix Brych thutluknaah Atletico manager Diego Simeone a lawm lo a, German referee hian season hmasa Champions League quarterfinal-ah tho Atletico hi Real Madrid nen an inhmachhawn
ṭuin an midfielder Arda Turan a lo hnawtchhuak tawh bawk.

Red card a hmuh vanga hreh­awm a tih thu sawiin Torres chuan, "Football ka khelh ve tawh china ka hun tawn hrehawm ber zinga mi a ni. Ka ṭhiante player 10 a an khel tura chhuhsan kha a hrehawm a, khel tluan ni ila chuan result pawh a danglam ang. Kan beisei erawh a la tawp lo a, Calderon-ah eng pawh a la danglam thei," tiin beisei an la neih thu a sawi.

Atletico Madrid defender Filipe Luis chuan Torres-a'n red card a hmu chu a hriatthiam loh thu leh Barcelona chu Champions League aṭanga an tlak an hlauh vang mai mai ni hiala a hriat thu a lo sawi chhuak ve bawk.

Barca an ṭha zawk

Inrinni zan khan El Clasico khelh niin Luis Enrique nauten inelna hrang hrangah match 39 chhung chak loh nei loa an kaltluang lai chu Real Madird-in 2-1 in an tih tawp sak. Barcelona an tho leh nghal a, La Liga lama an elpui ni bawk Atletico an hneh leh nghal.

Tun season league match-ah Barcelona hian Atletico lakah vawi hnih hnehna an lo chang tawh a, tun hnaiah inelna hrang hranga an intawn hnuhnung vawi sarihah hnehna an chang vek bawk. Simeone-a naute tan semifinal lut tur chuan thapui an thawh a ngai tawh dawn.

Eng nge an sawi?

A player-te a chhuan thu sawiin Barcelona manager Luis Enrique chuan, "Atletico nena inkhelh hi chu engtik lai pawhin a harsa tih kan hre ṭhin. Mahse, ka player-te an hriam tawk a, anni ho nen hi chuan a ṭha ber leh sang ber kan thleng thei zel ang," tiin a sawi.

Atletico Madrid manager Diego Simeone chuan, "Chak thei turin bul kan ṭan a, kan dinhmun pawh a ṭha hman. Thilthleng vanga kan rilrua awm zawng zawng sawi chhuah a ṭul lo a, Torres lakah erawh ka thinrim lo. Atletico ka enkawl thei hi ka inchhuang a, ka naute hian round sang zawk thleng thei tura beiseina nei chungin khelmual an chhuah san a ni," tiin inkhelh a la tawp loh thu a sawi.

Inkhel chheHvel

• Fernando Torres chuan Zla­tan Ibrahi­movic leh Andriy Shev­chenko te lo tih tawh ang ti ve theiin Champions League-ah club pahnih tan Barca lakah goal a khung ta.

• Barcelona-in Champions Lea­gue-a goal 53 an khung zinga 44 (83%) zet chu Lionel Messi, Luis Suarez leh Neymar te khung a ni.

• Tun season Champions Lea­ gue-ah Barcelona leh Real Madrid te chiah hi tlawm nei loa kaltluang an la ni. Barca hian season hmasa aṭang khan match 22 khel tawhin vawi 18 ngawt hnehna an chang.

• Luis Enrique-a'n Barcelona a enkawl hnuin Nou Camp-ah Champions League match 11 khelh pui tawhin hnehna a la chan pui vek.