Premiership-ah Rangers an kir leh ta

November, 2011-a Mizo tlangval Jeje Lalpekhlua leh India captain Sunil Chhetri-te'n trial an lo neih tawhna Scottish club lian Rangers chuan kum li hnuah Scottish Premier League an khel ve leh dawn ta - an hmelma kumhlun Celtic F.C. nen an inel leh thei tur hi British football ngainatute chil ti puttu a ni.

Thawhlehni zan khan Rangers hian Dumbarton chu James Tavernier-a goal hmangin 1-0 in an hneh a, match li khelh tur la awmah Scottish Championship title lain table chung berah point 17 laiin an sang fal.

Rangers manager Mark Warburton chuan, "Fan-ten harsatna tam tak an lo paltlang tawh ka ngaihtuahin zaninah hian ka lawmpui em em a, player leh club-te tan Scottish football inelna sang bera kan kir leh ta hi a ropui a ni," a ti.

Kum 53-a upa manager chuan sawi chhunzawmin, "Player-te hian a tir aṭanga an duh ber chu Premiership kai leh nghal a ni. Mahse beiseina sang tak leh boruak sang tak an phurh tel a ngai a, fak tur an awm a nih chuan player-te hi fak tur chu an ni," tiin a player-te a dah pawimawh thiam hle.

Rangers zinkawng

Rangers hi kum 2012 khan leiba an ngah avangin an talbuai a, Scottish football-a division hniam berah paih-thlak niin vawi 54 lai league nomawi chawi tawh club hian league Two aṭangin bul an ṭan ṭha.

Ally McCoist-a enkawlhna hnuaiah Rangers-in League Two-ah ro an rel nghal a, anmahni hnaih bertu aia point 24-a sang falin League One-ah an in vawrh chho lehnghal.

League One-ah Rangers khing zo an la awm chuang lo. Glasgow khaw-puia innghat club hian season a match 36 inkhel an hmachhawnah vawi thum hnehna changin vawi thum an khingpui an inhnehtawkpui a, pahnihna Dunfermline aia an san falna chu point 39-a ni.

Championship-a an season hmasa berah erawh Scottish club ṭha zinga sawi tel ṭhin Hearts leh Hibernian-te Championship lamah an relegate avangin Rangers tan beisei ang ngawtin thil a kaltluang lo.

Hearts-in champion nomawi chawi chungin Premiership an kai a, manager McCoist-a'n a chhuahsan avanga team enkawltu Stuart McCall kaihhruaina hnuaiah pathumna dinhmun an luah. Play-off final ah Motherwell hneh lo zui nghalin Rangers fan-te'n Premiership khel turin kum khat dang an nghah a la ngai.

The Warburton revival

South Africa sumdawng hausa Dave King-a kaihhruaina hnuaiah Rangers-in an manager atan kum 2013-14 English League One-a Brentford champion puitu Mark Warburton an la lut a, an tisual lo.

Warburton hian a league match hmasa 11-ah Rangers hi hnehna a chanpui nghal a, krismas vuakvetah an talbuai deuh avangin Falkirk leh Hibs-in hnaih ve deuh mah se tun hnaia an match 19-ah vawi khat chiah tlawmin an champion ta.

Kum li hnuah Scottish Premiership-in kum 1961-a British club zinga UEFA hnuaia Europe inelnaa final lut hmasa ber club a hmu leh dawn ta a, British football ngainatute tan chuan harsatna ruam aṭanga Rangers an ding chhuak leh ta hi lawm lohna chi a ni lo.