June thla tawpah FA Cup

Football Association chuan nimin khan FA Cup khelh hun tur ruahmanna an ti chhuak a, quarterfinal khelh hmabak chu June 27 leh June 28-ah khelh tum a ni. Ruahman dan chuan July 11- 12 hian semifinal khelh a ni dawn a, final hi August 1-ah khelh a ni ang. 

FA chief executive officer Mark Bullingham chuan, "FA Cup hian English Football-ah kum 150 dawn chu hmun pawimawh tak a chang a, inelna ṭan leh tura ruahmanna kan siam thei hi a lawmawm. Premier League thuneitute leh club-te pawh ruahmanna siam kawngah min thlawp avangin an chungah kan lawm hle," tiin a sawi.

FA Cup-ah hian club lian Manchester City, Manchester United, Arsenal leh Chelsea te an la dam a, heng club palite hi quarterfinal-ah an inhmachhawn dawn loh avangin inelna hi hmuhnawm chho turah a ngaih theih.