A ropuina ramah Jurgen Klopp a kir dawn
Liverpool manager Jurgen Klopp-a'n, "Khawvela club lian ber pahnih kan inhmachhawn dawn a, thla rei lote liam taa Europa League dah sang lotu tam takin tunah chuan he inelna lam hi an hawi tawh ang," tiin Europa League quarterfinal-a Borussia Dortmund nen an inhmachhawn tur chungchang a sawi a, a sawi fiah thiam hle.
Zanin dar 12:35-ah Liver-pool-in Europa League quar-terfinal first leg khel turin Signal Iduna Park an pan dawn a, kum sarih chhung zet Dortmund-a enkawl chhunga Bundesliga (2), German Cup (1), German Super Cup (2) nomawi chawitu manager Jurgen Klopp-a tan inkhel danglam bik a ni dawn.
Gundogan a dam
Borussia Dortmund-in Li-ver-pool an hmachhawn hma-in chanchin lawmawm an nei a, chu chu March 5 hnua la inlan leh lo German midfielder Ilkay Gundogan-a'n training a zawm leh ta hi a ni.
Kar hmasa Inrinnia Werder Bremen an hneh ṭuma inlan lo defender pahnih captain Mats Hummels leh Sokratis Papas-tathopoulos-te chuan Reds lakah inkhel bul an ṭan beisei a ni a, Liverpool tlarhma tan hriat nuam a ni lo ang.
Reds tlarhnung tana ven uluk ngai erawh Pierre-Eme-rick Aubameyang a ni. Gabonese striker hian tun season-a inelna hrang hrangah match 41 khelin goal 36 a khung tawh a, Europa League-ah top scorer ni mekin match 12 a inlanah goal 10 a khung tawh.
Team ṭha Reds
Liverpool-in Europa League quarterfinal lut turin an hmelma kumn hlun Manchester United chu last 16 aṭangin an hnawt chhuak a, Klopp-a naute hi Dort-mund khelmualah an tlangnel a nih pawhin a mak lo ang.
Reds tlarhma lamah Chris-tian Benteke chu hliam vangin a la chawl mek a, last 16-a United nen an inhmachhawn ṭuma inhliam Roberto Firmino chu a dinhmun a chiang lo bawk.
English club hi lungphang lutuk tur erawh an ni lo. Tlar-hmaa chhawr turin tun hnaia khel ṭha thei tak Philippe Coutinho leh Adam Lallana an awm a, striker Daniel Sturridge-a'n ngai a awh chho mek bawk avang-in Dortmund tlarhnung tan lungmuang taka awm ngawt chi a ni lo.
Inngam tawk
Tun hmain team pahnih hi vawi thum an lo inhmachhawn tawh a, chungnung zawk an awm lo. Vawi khat ve ve chak zawk dinhmun luahin vawi khat an inhnehtawk thung a, team pahnih squad thlirin tun ṭumah pawh a chungnung zawk tur sawi thiam a harsa hle.
Team pahnih intawn hmasak ber hi 1966 European Cup Winners’ Cup final-ah khan a ni daih tawh a, Glasgow khawpuia inkhelah hian Bill Shankly-a enkawl Reds chu 2-1 in extra time-ah an tlawm.
Kum 2001-02 UEFA Cham-pions League group stage-ah team pahnih hi an intawng leh a, Germany-a 0-0 a an inhnehtawk hnuah Anfield-ah Liverpool hi 2-0 in an chak.
Watzke-a hlauthawng
Dortmund khawpuia chan-chinbu lar tak Ruhr Nachrichten chief sports editor Sascha Kla-ver-kamp chuan Jurgen Klopp chu Dortmund-ah chuan pathian ang mai a nih thu a sawi a, kum 2008-a club tlachhe tawh tungding lehtu manager hi Dortmund fan-te'n zah taka an lo dawn sawn a rin thu a sawi.
Mahse, Sascha Klaver-kamp-a ṭawngkam vang tak hian Borussia Dortmund CEO Hans-Joachim Watzke a hlauthawng thung. Klopp-a nena inṭhian-
ṭha tak Watzke chuan, "Ka hlauhthawn ber chu Klopp hi fan-te'n an lawm si a, a lamah kan fan-te hi an ṭang vek mai ang tih hi a ni. Friendly match ang maiin fan-te'n an ngai palh ang tih hi ka hlauthawng a ni," a ti.
Watzke chuan sawi chhun-zawmin, "Kan fan-te'n Jurgen Klopp-a chungah an zahna an lantir ngei ka duh a, mah se chu chu inkhelh hma emaw inkhelh lai ni loin inkhelh zawhah ni se ka duh a ni. Liverpool ang club ropui hneh tur chuan kan ṭanrual a ngai takzet a ni," tiin fan-te chu inkhelh laia Klopp buaipui lo turin a chah!
Dortmund striker Aubame-yang pawhin an inkhel tur chungchang sawiin, "Kan tan chuan game ropui bik a ni dawn. Game harsa tak a ni dawn a, mah se Klopp-a hnenah team
ṭha tak ni leh tura kan thawhrim zia hmuhtir kan tum a ni," a ti.
Barcelona leh Real Madrid nena sawi zawm striker chuan amah siam liantu theihnghilh loin, "Klopp-a lakah hian bat tam tak ka nei a, thil tam tak min zirtir a ni. Vawiina ka khelh dan hi ṭha in ti a nih chuan - hei hi Klopp avanga ka tih theih a ni," tiin a boss hlui chu a dah sang hle.
Klopp-a thukhawchang
Kum 2013 Champions League final-a Dortmund hruai thlengtu Klopp chuan, "Kan match khelh turah hian ka chungchang thuin ngaihven a hlawh tih ka hria a, mah se hei erawh dah ṭhat ka duh a ni. Dortmund-ah chak ngei tumin kan kal ang a, ka player-te'n an theihna zawng zawng an pe tur a ni. Inkhelh zawhah erawh kan duh duh kan sawi dawn nia," a ti.
Klopp chuan Dortmund-a a kir tur chungchang sawiin, "Dortmund hnena ka team thar ka hmelhriattir thei tur hi ka lawm a ni. Reds player-te'n Dortmund stadium ropui leh a khawpui nuam tak an hmelhriat tur hi ka lawm takzet bawk. Hetiang thawnthu ngaihnawm hi chu football chauhin a ziak thei a ni," tiin a khawpui ngainata a kir tur chungchang a sawi.
German manager chuan Dortmund nena an inkhel tur chungchang sawi nghalin, "Europa League-ah Dortmund ka tum châk loh ber thu ka sawi a, a chhan chu team ṭha tak an nih vang a ni. Mahse, Europa League quarterfinal i khel a nih chuan team ṭha tak i tawn a ngai miau si. Mahse, keini pawh team ṭha tak tho kan ni a, khelh dan tur chu kan hria. Dortmund player hi 98% vel chu ka hriatchian an ni a, khawvel pumpuiin a thlir tur match kan khel dawn a ni," tiin a club hlui nena an inhmachhawn tur chu a dah sang hle.