Clay atan Federer leh Nadal inpuahchah

April 10-17 chhung khian ATP 1000 Monte Carlo Masters khelh a ni dawn a, tun season-a an Clay Court Tournament hmasa ber hmachhawn turin Roger Federer leh Rafael Nadal an inpuahchah mek.

Pathiannia khelh zawh tak Mia-mi Open-ah Swiss thiampuipa Federer hi a khup an zai hnua a vawi khat nan inlan tura ngaih ni mah se inelna ṭan dawn ṭepah a inhnukdawk. Spanish tlangval Nadal pawh second round-ah Damir Dzumhur nen an inkhelh laklawh laia a lu hai vangin a inkhel tluan thei lo.

Grand Slam vawi 14 champion tawh Nadal-a'n tun hnaiah a taksa hriselna lamah harsatna dang a nei leh thut a nih loh chuan Clay tournament khel tura a inpeih thu a sawi a; January thlaa Australian Open semifinal-a Novak Djokovic a hneh loh hnua la inkhel leh lo Federer pawh a inkhelh theih tawh beisei a ni bawk.

World number 1 Djokovic hi Monte Carlo-ah hian champion tura rinkai ber a ni leh dawn a, ani hian Miami Open title a lak hnuah Clay-ah hlawhtling tura a inbuatsaih ngawrh tur thu a lo sawi tawh.

Serbian thiampuipa hian Grand Slam title 11 la tawh mah se Fren Open-ah a la hlawhtling ve lo a, kum-inah hian a vawi khat nan Paris-ah beiseina a nei sang ve hle.