Nomawi duha tuihal Azarenka

Victoria Azarenka chuan Serena Williams lal ram a rawn ṭhiat mek zel niin a lang. Kar hmasa lawka WTA Miami Open title a lak hnuah champion nomawi dang chawi chaka a tuihal thu a sawi chhuak.

World number 1 hlui Azarenka hian kum duhawm a hmang mek a, Australian Open-ah Angelique Kerber laka a chak loh tih loh chu match 23 a khelh tawh aṭangin vawi 22 hnehna a chang thei. WTA Premier event pahnih Indian Wells leh Miami-ah a zawna hlawhtlinna a chan theih avangin Belarus nula chanchin hi tunlai hmeichhe tennis titi tui ber a ni mek.

Azarenka hian kum 2012 leh 2013 khan Aus-tralian Open champion nomawi a lo chawi tawh a, world number 1 dinhmun hial luah mah se hliam a tawrh fo avangin beisei angin hma a sawn lo. Kuminah erawh a theihna leh thiamna a takin a rawn phochhuak leh mek a ni.

Kum 26-a upa Aza-renka chuan, "Ka dam
ṭhat a, harsatna nei loa ka inbuatsaih hi chuan
ṭha takin ka khel chhuak thei ṭhin. Court pawm lamah inbuatsaihna ka neih nasat ṭhin avangin a takah pawh chu chuan nasa takin min pui ṭhin. Thui tak sawi lawk theih ni lo mah se a tam thei ang ber nomawi chawi ka tum," tiin a sawi.

2013 French Open semi-finalist chuan Clay court chungchang sawi chhunzawmin, "Kum dangah Clay-ah hian beisei ka phak ngai lo a, kuminah pawh min biesei sang lo. Mahse ka thawhrimna vang hian ka tana hmun harsa ni ṭhin chu hmun nuamah chan tir ka tum," tiin a inringtawk hle.