Hun tlem ka la nei - Rooney

Premier League sea-son kal meka striker hriam ber pahnih Harry Kane leh Jamie Vardy te chu England international ni mah se Wayne Rooney a la inringtawk a, ram aiawha khelhna hmun a tan a la awm thu a sawi.

Manchester United forward hian England-in Euro 2016 an khelh theih nan a thawhhlawk hle a, qualifying-ah goal sarih khungin ram tana goal khung hnem ber nihna a chelh tawh nghe nghe.

Kum 30-a upa Rooney chuan, "A bik takin tun hnai kum hnih chhungin ka khel ṭha hle a, goal pawh ka khung hnem. Team-in hlawhtlinna a chan zel theih nan theihtawp ka chhuah chhunzawm zel ang," a ti.

England tana goal 51 khung tawhtu Rooney chuan sawi chhunzawmin, "Ka naupan deuh lai kha chuan ka dawhthei tawk lo a, tunah chuan ka kum a tam ve tawhin ka mizia pawh a danglam tawh. Ka ngaihdan chuan kum tam tak chu ni tawh lo mah se kum rei vak lo chhung chu ram tan ṭha takin ka la khel theih ka beisei," tiin a sawi.