NT Biakkima'n WBC Asia title beisei

Mizo zinga professional boxer hmasa ber ni tura inbuatsaih mek NT Lalbiakkima chuan July-a WBC Asia title fight nei turin hma a la mek a, Siaha tlangval hian he title fight hi a nei thei a nih chuan Mizo mai ni lo Indian boxing tan chuan bung thar a ni ang. 

NT-a hi June 8, 2018-a world number 1 leh Olympic champion Hasanboy Dusmatov a hneh avangin Indian media-te chuan an hmelhriat ṭan a, mahse amateur boxing hnuchhawnin professional lam luhchilh turin VN Promotions-ah kum thum atan contract a ziak. 

VN nen an inremna ang chuan NT-a hian kum khatah fight pathum nei tur a ni a, mah se Covid-19 vangin tun thlengin professional fight a la nei thei lo - tunah WBC Asia title fight nei turin hmalak a ni a, corona-virus-in hei pawh hi thui tak a hril ang. 

South Korea-a inkulh mek NT-a chuan, "Kan pu ten nasa takin hma an la a, a buaithlak lai chu tumpui tur lam hi a ni. WBC Asia strawweight title hi kawltu awm loin a ruak mek a, hei hi chuh kan tum. 

"Amateur-ah record ka neih ṭhat avanga title fight beisei ngam ka ni a, chutihrual chuan South Korea-ah hian title fight nei tur khawpa record nei ṭha an awm rih lo. Covid-19 vangin zin veivah leh thil dangah harsatna tam tak a awm a, hei hian kan kawng min la dal rih deuh a ni," tiin Vanglaini a hrilh. 

NT-a inlanna hi minimum-weight tia hriat a ni bawk a, he weight hi Philippines, Thailand, Japan leh Indonesia boxer-te ṭhatna a ni a, heng ram palia boxer ṭha hi Mizo boxer hmachhawn tur hian thlithlai mek an ni. 

LPS Pro Fight lightflyweight-a a zawna vawi nga champion thei NT-a hi Filipino boxer hlui Michael Villarma Landero enkawlna hnuaiah a inzir mek a, Landero hi IBO world minimumweight title fight-ah pawh inlan phak khawpa boxer ṭha ṭhin a ni.