Tuin nge BYE BYE zawk dawn? Mission Veng Vikings Vs Tuikual South

Zanin hi tualchhung basketball ngainatute hun nghahhlelh chu a ni a, kan nghak chhuak ta. leh Tuikual South ten zanin dar 8:00 hian Hawla Indoor Stadium-ah Mizoram Super League semifinal game 3 an khel dawn a, a chak zawkin final an lut ang.

Ruah pawh sur se

Game 2-ah inkhelh ṭan hmain ruah a sur a, chutichung chuan stadium khat vekin mipui an pungkhawm. Game 3-ah hian ruah pawh sur se, Mission Veng leh Tuikual South mipuiin inkhel en an ṭhulh phah dawn lo a, veng pawn lam aṭangin Vikings leh TKS ṭantu an awm nual a, anni pawh hi ruah surin a dang lo ang.

Tun ṭum hi basketball ngainatute fiahna tur a ni a, supporter chauh punkhawmna tur a ni lo. Game 3 khel tur team pahnih hian ṭantu nei lo pawh ni se game pawimawh bikah chuan Hawla Indoor Stadium khat tawk hi basketball ngainatu an awm tur a ni.

An cho sual em?

Tuikual South-in game 1-ah Vikings an sawp a, second 54 chauh a awm tawh tihin beidawng takin Mission Veng mipui an haw. Tuikual South lamin en liam mai an tum lo a, deusawh takin ding chungin an bye bye a, tih theih nei lo Mission Veng thâ a na hle.

Vikings rilru na a kaw tawpah an ṭang a, Dishant V Shah an chah chhuak. Gujarat center zarah Mission Vengin game 2 zawhah Tuikual South an bye bye ve ta a, team pahnih inan lohna chu Tuikual South ṭantuten hrehawm ti ve tho mah se an inhawsan ve lo.

TKS-in game 1 chak nuam an tih luatah Vikings ṭhat dan ber an cho chhuak a, game 2-ah hneh lo mah se an tlawm lo. Game 3 bak a awm tawh dawn loh avangin zanin inkhel boruak hi a sang ang.

Lalrina leh Dishant

Vikings-in hnehna an chan zawhah TKS coach KC Lalliantluanga chuan an chak loh chhanah Lalrina Renthlei leh Dishant te chu a ngai a, player dang zawng chu player ṭha pahnih vang chauha par chhuakah a ngaih thu a sawi.

Tuikual South coach thusawi hi inkhel entuten a dik zia an hmu a, amaherawhchu feet ruk leh inches riata sang Dishant leh talent nei ṭha bik Lalrina te hi awlsam taka dan theih an ni dawn lo.

TKS coach KC-a chuan, "A dan dân tur chu kan zir a, kan hlawhtling ngei ang chu ka ti lo. Mah se theihtawp kan chhuah avangin game 2 ang ngawt chu a ni tawh lo ang," tiin Vanglaini palai a hrilh.

Game 3-ah hian Mizoram chhunga guard ṭha bera sawi ṭhin Lalrinkima a khel thei dawn a, amaherawhchu Kima leh Lalrina hi MSL2 bikah chuan an la inkawp fuh lo. Tuikual South hian Kima, Lalrina leh Dishant tel vekin league round-ah Vikings an hneh tawh a, Saron Veng tlangvalin engti hawi zawngin nge inkhel result a thlak danglam dawn tih hi hriat a châkawm takzet.

Game boruak sang chinah squad neih chhah a pawimawh a, Vikings-in player ṭha bik nei mah se final lut tur chuan Moses Zoremmawia, Lalrempuia, Lalmuanawma leh Vannunpuia Varte te an la pawimawh reng.

Rakesh leh ChP-a

Tuikual South ṭantuten Rakesh-a an hriat chhuah theih nan Dishant-a'n a dunk khum a, Phengphehlep lamin Haryana forward hi zuk be ngial mah se an chah chhuak thei lo. TKS harsatna belhchhah turin pakhat lakchhuah tur ni se, uiawm ber tura ngaih Vanchuangpuia chu damlohna vangin game 3-ah a inlan theih hmel loh.

Rakesh leh ChP-a tel lo chuan Tuikual South hi team ṭha lo zawk (ṭantu erawh nei ṭha zawk) an ni tawh a, amaherawhchu hrem vanga game 2 khel thei lo MS Dawngzela Chenkual an chhawr theih dawn avangin Vikings barakhaih turin an la ṭha tawk.

Tuikual South innghahna tur chu an veng tlangval F. Zodinthara, Lalrohlua leh Lalchhanchhuaha (Dodo-a) te an ni dawn a, team captain Dina hian game 2 quarter tawp bera anga a khel leh thei a nih chuan dan theih a ni lo ang. Rohlua hi a thawhrim avangin team tan a ṭangkai a, Dodo-a hi a naupanna anga en chi a ni lo bawk.

College Veng tlangval Dawnga hi Dishant-a dangtu tur a ni dawn a, court chhungah a pawimawh dawn a, an veng mipuiin an ṭawiawm ṭhat chuan court pawn lamah pawh a ṭangkai dawn tihna a ni. Game 2-a beisei pha lo Lalmuanpuia Zote hian MSL1-ah point a ngah ber a, a chetfuh ṭum chuan Ramhlun North tlangval hi dan theih a ni lo. Mapuia Zote bakah Upper Kanan tlangval K. Vanlalruata te hi an chetfuh chuan anmahni chauh pawha team chakpui thei an ni.

An lawm

Mission Veng Vikings manager H. Lalhruaitluanga chuan, "Kan veng aṭang hian Pu Jeffrey L. Fanai chuan mipui chuanna tur bus min tum sak ṭhin a, Mission Veng Local Council leh MHIP ten pawisa min pe ziah bawk. Hei bakah hian hmun hrang hrang aṭangin ṭanpuina kan dawng deuh reng a, chung zawng zawngah chuan lawmthu kan sawi an ni," tiin a sawi.

Tuikual South manager Lalremsiama Hrahsel chuan, "Min sponsor-tu Chhangte Catering, MS Ford, Emy Drug Store, RTP, Graceland Dental clinic te hi tun dinhmun kan thlen chhan a ni. Vengchhung leh pawn aṭanga donation petu zawng zawng chungah lawmthu kan sawi a, Pathian leh min ṭanpuitute hi kan chakna hnar an ni," tiin Vanglaini palai a hrilh.

Vikings leh TKS manager te hian an vengchhung mipuite chu inkhel en ngei turin uar takin an sawm bawk.