Si khata chak Bayern la him lo

Allianz Arena-ah Arturo Vi-dal-a'n inkhelh ṭan aṭanga second 110 lekah tauh goal khung mah se Bayern Munich-in goal dang an khung belh thei loh avangin UEFA Champions League semifinal an la lut chiang lo.

Thawhlehni zan khan Bayern-in an mualah Benfica 1-0 in an hneh a, April 13 zanah Estadio da Luz-ah second leg an khel leh ang.

Goal khat lek

Bayern-in first half tan thunun a, Benfica tlarhnung tan Douglas Costa, Franck Ribery, Thomas Muller leh Robert Lewandowski te dan harsa mah se goalkeeper Ederson chet ṭhat zarah goal khat bak chhuah lohin first half an hmang tluan thei hram.

Second half-ah Benfica stri-ker Jonas chuan David Alaba vir khum mah se Manuel Neuer-a'n Brazilian striker goal khung tur hi a dan sak. Santos striker hlui Jonas hian an siphurh sutna hun ṭha a hlah a, Greek striker Konstantinos Mitroglou finishing ṭhat tawk loh zarah Bayern an him hram.

Beisei nei Benfica

Benfica-in first half-ah Bayern tlarhnung an tibuai pha lo a, second half erawh a dang hlak. Portuguese club hian Germany-ah draw result hlawh chhuak se thilmak a ni lo ang.

Tunah chuan Benfica-in an mualah Bayern an mikhual dawn a, semifinal lut turin beisei sang tak an la nei tih a chiang. Amaherawhchu second half-a yellow card hmu Jonas chu hrem vangin a inlan thei dawn lo.

Treble champion

Bayern-in Pep Guardiola thlah nan nomawi pathum an la chawi thei. Bundesliga-ah hmahruaitu niin Borussia Dort-mund aiin point ngain an sang a, German Cup-ah semifinal lut tawhin Weder Bremen nen April 19-ah an inkhel ang.

German club ang thoin Bar-celona an la treble champion thei a, Paris Saint-Germain la ro-pui leh hretin nomawi pali (quadruple) an la chawi thei thung.

Eng nge an sawi?

Benfica manager Rui Vitoria chuan, "Kan tum danah hma taka goal chhuah kha a tel lo a, mah se goal vang khan kan inrintawkna kan hloh lo. Inkhel tawp lamah phei chuan kan khel ṭha takzet a ni. Karleh lamah chuan mipui 60,000 chuangin min ṭanpui tawh dawn a, beiseina sang tak kan nei a ni," tiin semifinal luh beiseina an la neih thu a sawi.

Bayern Munich manager Josep Guardiola chuan, "Benfica hi team ṭha an ni tih kan hria a, kan result hlawhchhuahah kan lawm a ni. Lisbon-ah pawh chak kan duh a, goal hnih khat khung belh kan duh. Quarterfinal match hmasa zawkah chak mah ila semifinal lut turin dinhmun ṭha zawk an awm lo," tiin goal khat lek chu chhuan tlak a nih loh thu a sawi.