Djokovic hmachhawn tur Sinner

Set 15 a khel tawh a, a la fai vek - Jannik Sinner tan Australian Open 2024 khelh laiah thil harsa a la awm lo, a hmabak erawh a hautak dawn - vawiin hian Novak Djokovic nen final luh inchuhin an innuai dawn!

World number 4 Sinner-a'n inelna neih laiah player panga chu straight set hmang vekin a hneh. Thawhlehni zan khan player ṭha Andrey Rublev chu darkar hnih leh minute 39 chhungin 6-4 7-6(5) 6-3 a hnehin semifinal a lut.

Sinner a nghet

Italy hmar chhak South Tyrol tlang hual vela awm Sinner hi ban dinglam hmang thiam a ni a, kum 22 mi chauh la ni mah se a huaisenin a puitling tawh. Russian player Rublev hi a chetsual theihna tura ngaih ni mah se buai loin a chingfel awlsam hle.

Seeded palina Sinner chuan, "Andrey Rublev nen hian tun hma pawhin match hautak kan lo khel tawh, tun ṭumah pawh a awlsam lo. Zan rei tak thleng kan inkhel a, entu awm loa inkhel ni ila a hrehawm khawp ang, a tawp thlenga min entu chungah ka lawm," a ti.

Sinner leh Rublev te hi an inkhelh zawh meuh chuan Melbourne khawpuiah zing lam dar 1:30 a ni tawh. Quarterfinal aṭangin inkhel zawng zawng Rod Laver Arena-ah vek a nih avangin match a rei chuan a hnung lama inkhel tan a tlai duh hle.

Hmabak Novak

Player ṭha tak ni mah se Sinner tan final luh a awlsam dawn lo, vawiina a hmachhawn leh tur Novak Djokovic hi Grand Slam vawi 24 champion tawh a ni satliah lo, Australian Open bikah phei chuan vawi 10 champion tawh a ni - hna a hautak dawn hle.

Semifinal thlirlawkin Sinner chuan, "Novak hian he hmunah hian vawi tam tak hnehna a lo chang tawh a, ka tihtheih awmchhun chu point awm thei zawng zawngah theihtawp chhuah tawp mai a ni ang, eng nge lo thleng dawn chu kan hria ang," tiin a zam duh bik lo.

Player pahnih te hi season hmasa ATP Finals-ah khan vawi hnih an intawng, group match-ah Sinner a chak laiin inkhel pawimawh leh nomawi inchuhna inkhel zawkah Djokovic a chak thung, tun ṭumah hian tu zawk pawh chak ni se la straight set a nih a rinawm loh.

Medvedev a tlang

Nimin quarterfinal inkhelah Daniil Medvedev chuan darkar thum leh minute 59 chhungin a khingpui Hubert Hurkacz chu 7-6(4), 2-6, 6-3, 5-7, 6-4 a hnehin semifinal a lut, a match lehpekah chuan Carlos Alcaraz leh Alexander Zverev inkhela chak zawk a hmachhawn ang.

Seeded pathumna Medvedev hian hnehna chang turin winners vawi 43 a vaw chhuak a, tun hma lama final vawi hnih a khelh tawhna hmunah hian champion turin theihna a nei a ni tih a takin a lantir nawn, nomawi chawi turin match pahnih a la hmabak.

Chak lo zawk Hurkacz hi tun inelna neih laiah chuan service nei ṭha berte zinga mi a ni a, tun ṭumah pawh hian aces vawi 16 a siam - a service ṭhain hlauhawm viau mah se Medvedev a ṭang tlang thei a, a service vawi khat lek a chhuhsak chu chak nan a tawk.