Mizoramin semifinal an lut

Khelo India Youth Games 2023 hmeichhe hockey-ah Mizoramin nimin khan Chattisgarh lehthalin 3-1 in hnehna an chang a, semifinal an lut. January 26, Zirtawpni chhun dar 10:00-ah Haryana nen final khel tur an zawng ang a, semifinal pakhat zawkah group A pakhatna Madhya Pradesh leh Odisha te an inkhel bawk dawn.

Mayor Radhakrishnan Stadium, Chennai-a inkhelah Chattisgarh-in first quarter-ah goal an khung nghal a, Mizoram an hnual phah lo. Lalremsiami Hmar chher chhuaktu SYS coach Lalroṭhuami (coach) leh R. Lalnunmawii (manager) kaihhruai team hian huai takin an nawr let a, rah ṭha an seng.

Mizoram tan Hnahthial tleirawl Lalrinpuii'n siphurh sutna goal a vaw lut a, Lunglei centre half F. Lalbiaksiami'n hmahruaina goal khungin Rotlang West forward Lalpeksangi'n chak nemnghehna goal a khung.

Khelo India-ah hian Mizoram bul ṭan ṭha tawk lo mah se an insiamrem chho a, match thumna an khelh meuh chuan fitness bakah an khelh dan thlengin a nghet ta deuh. Semifinal-ah hian Mizoram hian group B pakhatna Haryana hmachhawn dawn mah se match zawna an chak tawh avangin inrintawkna nasa tak an nei ang. Haryana hian group hmahruaitu ni tur hian Odisha 2-1 in an hneh a ni.

Mizoram coach Lalroṭhuami chuan, "Kan naute hian theihtawp an chhuah ṭhin a, an fitness hi duhthusam ang thlap erawh a ni chiah lo. Mizoram tan medal lak ngei tumin theihtawp kan chhuah ang," tiin Vanglaini a hrilh.