Final khel tur Kolasib leh Champhai

PMJVK Inter District Junior Boys Football Championship semifinal-ah Kolasib DFA-in inelna thlengtu Aizawl DFA an pet tla a, Champhai DFA-in Mamit DFA an sawp bawk. Final hi December 26, Zirtawpni hian RG Stadium-ah khelh tur a ni a, sports minister Lalnghinglova Hmar chu khuallian a ni ang.

Nimin inkhel hmasa zawkah Kolasib leh Aizawl ten hun pangngaiah goal an khung lo a, penalty shootout hmanga chak zawk zawn a ni. Quarterfinal-a Kolasib chhanhimtu Lallawmzuala bawk a che ṭha a, Kolasib keeper hian Aizawl tana Francis Lalhruaizela leh Lalvohbika te pet dang. Kolasib tana pettuten an pet ṭha vek a, Brett VL Malsawmhlua'n chakna goal khungin 4-2 in an chak.

Inkhel hnuhnung zawkah Champhai an chungnung a, Mamit lakah Lalrammawipuia'n hattrick siamin man of the match-a thlan a ni a, Joel Zorintluanga'n goal khat a khung ve bawk. Champhai hian 4-0 in hnehna an chang.