Boro tan ChelSIX an hrang lua!

Middlesbrough-in League Cup semifinal first leg-ah 1-0 in Chelsea an hneh a, London club elpui fans tam takin Chelsea chu fiamthu thawh nan an hmang a, Championship club laka tlawm team chungah zahngaihna an lantir lo.

Mahse, Premier League-ah pawh beisei phak lo Chelsea hian an khelh fuh ni chuan dan theih an ni lo tih an pholang a, beiseina sang tak nena Stamford Bridge-a lengtu Middlesbrough chu 6-1 in an lo sawp a, inthlahrung tak chungin an hawtir.

Chelsea tan Cole Palmer chuan goal hnih a khung a, Jonny Howson (own goal), Enzo Fernandez, Axel Disasi leh Noni Madueke ten goal khat ṭheuh an khung bawk - Boro tana Morgan Rogers-a goal khung chu mualpho zualpui khuhna chauh a ni.

A surin a sur

Stamford Bridge-ah Chelsea-in goal khung turin hun an mamawh rei lo. Ni 118 hnua a vawi khat nana Blues tana bul ṭan Ben Chilwell-a ball thlawh chu Raheem Sterling chuan Armando Broja tan a siamsak a, Boro captain Howson lo inrawlhin, an lamah a tilut!

First leg-a an lo tlawm tawh avangin 1-1 a ni chiah a, Chelsea tan a la tawk lo. Minute 29-naah Enzo chuan Blues ṭantute hlauhthawng tur beng daih nan a khung belh a, minute 36-naah Disasi chuan a belhchhah ve leh bawk.

Stamford Bridge boruak sang tak hnuaiah Boro an hlauthawng a, beisei an phak lo. Minute 42-naah Palmer-a'n a khung belh a, 4-1 in Chelsea-in chawlhlawk an hmang a, an goal khung hnuhnung pahnih hi Boro chetsual zar an zo ve ve a ni.

An inthlau

Boro-in chawlhlawk an ṭhatpui chuang lo. Minute 77-naah Palmer inlar lehin, kum 21 mi winger hian an goal hnihna a khung a, minute 81-naah Madueke chuan a hmawr a bawk - hun awm zat leh Chelsea goal khung zat ngaihtuahin chak tur a chiang tawh.

Mahse, Boro hian kut ruak maia haw chu a mualphothlak lutuka ngaiin, minute 88-naah Rogers hmangin an khung ve leh a, 6-0 a haw tur kha 6-1 in an haw a, an mualpho lutuk tur chu hliahkhuhin a awm - inkhel pahnih belhkhawmah 6-2 in Chelsea an chak.

Chelsea-in final an lut a, club neitu thar Todd Boehly leh a ṭhianten May 2022-a Chelsea an lei hnua final an luh hmasak ber a ni. Nizan khan semifinal inkhel dangah Liverpool leh Fulham an inkhel a, an result kan hre hman lo.

Champion châk Poch

Chelsea boss Mauricio Pochettino chuan champion châka a tuihal thu a sawi nghal a, Tottenham Hotspur a enkawl chhung zawnga nomawi chawi lo coach hian Blues tana nomawi chawi turin match khat chak chiah a mamawh ta.

Poch chuan, "He hmunah hian champion châkin ka tuihal a ni. Paris khawpuiah khan kum khat leh a chanve chhungin nomawi pathum ka chawi hman a, he hmunah pawh nomawi chawi ka duh. Ni e, ka champion châk takzet," a ti a, Paris St-Germain-a a lo hlawhtlin tawhna a sawi lang.

Argentine coach chuan sawi zawmin, "Hlawhtlinna ropui tak a ni tawh. Engmah lo mai aṭangin he team hi kan dinthar a, February-a Wembley kal theih hi kan duh chu a ni - Chelsea tan chuan Premier League leh Champions League angin a hlu lo a ni mai thei a, mahse, team kan dintharna kawngah a pawimawh a ni," a ti a, a lawm hle.