Chak nei loin India an tla
"Aw, a har ka ti mange!" tih chu Asian Cup-a India hla a ni - Blue Tigers hian Asian Cup-a an match hnuhnung berah Syria chu 1-0 in an ngam lo a, Asia khawmualpuia ram leh ram inelna sang ber chu chak nei loin an mangṭha.
Syria tan Omar Khirbin chuan inkhela goal awmchhun a khung a, India-in a chhanletna tur an neih loh avangin an tlawm - an match hmasa berah Australia chu 2-0 in an ngam lo a, Uzbekistan lakah 3-0 in an tlawm a, Syria lakah an tlawm leh ta.
Igor Stimac-a enkawl India hian match thum an khelhah goal ruk an chhuah a, goal an khung miah lo thung. India hi an awmna group thlirin an vanduai, tiin a sawi theih a, ISL-a sum luan hnemzia ngaihtuah chuan, "Hma kan sawn lo a ni" a tih theih bawk.
A tawi zawnga sawi chuan India-in hmasawn a la mamawh a, Asian football-ah hming langsar ni turin kawng zawh tur thui tak a la awm - India tan Asian Cup a tawp ta rih a, kum 40 chhunga Asian Cup-a an chet chhiat ber record a ni.
A harsa
India-in chak an mamawh a, an chak pawhin midang puihna an mamawh tel. Blue Tigers hian a tir lamah Mahesh Singh leh Lallianzuala Chhangte tlan chakna hmangin Syria an nawr a, mahse, chance mumal neih erawh an harsat.
Manipur winger Mahesh Singh hian minute thumna vel lekah chance duhawm a nei a, mahse, Syria keeper Ahmad Madania chuan ṭha zetin a dansak a, a bak chu Syria ta a ni tawh, tiin a sawi theih.
Peruvian club Allianza Lima striker Pablo Sabbag chuan corner aṭanga ball kal chu uiawm takin a tauh lut thei lo a, Argentine club Belgrano forward Ibrahim Hesar chuan Lalengmawia Ralte (Apuia) ball ken lai chhuhsakin, chance a insiam a, mahse, Gurpreet Singh Sandhu a paltlang thei lo.
Syria hian India an nawr reng a, Slovakian top division club Dunajska Streda midfielder Ammar Ramadan-a khung loh pawh Syria tan uiawm a tling a, goalkeeper Sandhu a che ṭha tel bawk - goal lut loin chawlhlawk hman a ni.
A tawpah Syria
Chawlhlawk hman hnuah pawh Syria bawk a nawr na tu an ni a, mahse, India tlarhnung an khel ṭha a, an ding khawng tlat - Blue Tigers tan Lallianzuala Chhangte pawhin chance duhawm a nei a, mahse, Syria keeper Madania ball dan per chu Lianzuala'n a la per hret a, goal-ah a shot hman lo.
Syria-in an nawr let zui a, Omar Khribin-a'n hnai set sawt aṭanga a tauh goal lohte chu uiawm tak a ni. Mahse, UAE Pro League club Al Wahda striker hi a vanduai reng lo - India defender pahnih ven karah mawi zetin a khung a, minute 75-na a ni.
Khribin-a'n goal a khung hnuah India an tho leh tawh lo - Syria ngam loin an tlawm a, Asian Cup an mangṭha. Apuia chuan, "Kan tan chuan a la sang deuh a ni. Team angin kan khel chhuak thei lo ṭhin a ni ber.
"Ka mimal khelh danah pawh ka lawm chuang lo a, kha aia ṭha zawk khan ka la khel thei tih ka hria," tiin Vanglaini a hrilh a, inzir belh tur tam tak an neih thu a sawi. Vaivakawn tlangval chuan, "Hmasawnna tur sawi dawn chuan tam tak a awm - insiamrem zung zung te, ball chana rilru huaisen tak neih a, pass theih tura lo insiamrem te, a tam lutuk. Zir tur kan la ngah hle," a ti.
A la tawp lo!
India forward Lallianzuala Chhangte chuan, "First XI player ṭhin inhliam kan nei nual a, kan tuar. Tawnhriat kan la nei ṭha tawk lo a, kan zir dan angin kan khel chhuak ngam tawk lo deuh em ni aw, ka ti bawk a, huaisen lehzual kan mamawh a ni," tiin an chak loh chhana a ngaih Vanglaini a hrilh.
Stimac-a hnuaia India tana hmun pawimawh chang ṭhin zingah Anwar Ali, Jeakson Singh leh Ashique Kuruniyan te chu hliam vangin Qatar-ah an zin ve thei lo a, squad-a awm ve ṭhin Glan Martins pawh hliam vang bawkin hruai a ni lo.
Hliam nei chungin Sahal Abdul Samad hruai a ni a, Syria lakah bench aṭangin a lut hman hram. Lianzuala chuan sawi zawmin, "Taksa leh tharum lamah hma kan sawn a ngai a, thutlukna kan siam ngam a ṭul ṭhin bawk. Kan group awmna hi a awlsam lo ve bawk," a ti.
Lunglei tlangval chuan sawi zawmin, "Tumah indem tur bik kan awm lo. Tlarhnung an chesual a nih chuan tlarhma lamin kan hna tur kan thawk ṭha tawk lo a ni mai. Hetia kan tawp mai hi a pawi ka ti a, kan tawp hlenna tur erawh a ni lo - kan lo kir leh ang," tiin Vanglaini a hrilh a, hmasawn a tumruh hle.