Australian Open - Vawiinah hmeichhe semifinal

Yastremska-i'n hma ding tur Chinese nula Zheng-i

Dayana Yastremska chuan nimin khan Australian Open semifinal-ah Linda Noskova chu 6-3, 6-4 in an hneh a, Ukrainian nula hian a vawi khat nan Grand Slam semifinal a lut.

Kum 23 mi Yastremska hi World ranking-ah number 93-na chauh a ni a, main draw hmachhawn turin qualfiying a paltlang. Open Era-ah kum 1978 daih tawh khan Christine Storey chuan qualifier paltlangin AO semifinal hi a lo thleng tawh a, Yastremska hi qualifier khel zinga a sang pali zinga invawkai leh thei hmasa ber a ni.

Yastremska hian Noskova hneh tur hian minute 78 a mamawh a, semifinal kalkawngah hian seeded no. 1 Iga Swiatek pawh a hneh tawh bawk. Inkhelh banah Yastremska chuan, "Sulhnu hlu tak ka hnutchhiah thei hi ka lawm, a chhan chu Christine Dorey-i'n mellung a phun hunlai kha chuan ka la piang lo," tiin a sawi.

Nimin tlai khan Qinwen Zheng-i'n semifinal lut turin Anna Kalinskaya chu 6-7 (4-7), 6-3, 6-1 in an hneh. Chinese tennis player Zheng hian vawiin chawhnu dar 3:15 hian Rod Laver Arena-ah Yastremska nen final khel tur an zawng ang.

Seeded sang engtikah nge an tlak?

Australian Open singles-ah hian player 128 an tel a, seeded 32 an awm. Champion turin vawi sarih chak a ngai a, final thleng turin vawi ruk chak a ngai tihna a ni.

Tun ṭuma seeded no. 1 chu Iga Swiatek a ni a, ranking no. 1 a ni hrim hrim. Polish star Swiatek hi grand slam-ah vawi li a champion tawh a, French Open-ah vawi thum champion tawhin US Open-ah vawi khat a champion tawh bawk.

Mahse, Australian Open-ah erawh Swiatek hian final a la thleng ngai lo a, kum 2022-a semifinal a thlen kha a thlen san ber a ni. Kum 22 mi Swiatek hian kumina a hneh loh chu Linda Nosková a ni a, Czech tennis player Noskova hian seeded nei pha lo mah se kum 19 mi chauh la niin hmabak a la nei êng hle.

Seeded sang 10 zingah Aryna Sabalenka leh Coco Gauff te chauh an dam tawh a, player ṭha pahnih hi semifinal-ah an inhmachhawn dawn avangin final khel tur pakhat zawk chu seeded 10-na chunglam a ni dawn tihna a ni.

Champion zawn a har

Australian Open hmeichhe singles-ah hian kum 10 chhung chu inelna zawna champion an awm tawh lo. Champion zawn hnuhnung ber chu Victoria Azarenka a ni a, kum 2012 leh 2013 khan a champion.

Belarusian tennis player Azarenka hi kumin inelnaah pawh a tel a, kum 34 mi ni tawh mah se seeded no. 18-na a la ni pha. Mahse, Azarenka hian fourth round-ah seeded ni pha lo Dayana Yastremska a hneh lo. Yastremska hian semifinal hial a lut tawh thung.

Australian Open-ah hian champion lai chu Aryna Sabalenka a ni a, ani pawh hi Bealursian tho a ni. Kum 25 mi Sabalenka hian semifinal a lut tawh a, seeded no. 1 niin champion nawn thei dinhmun a ding.

Gauff hmabak chu

Coco Gauff hi en thuak chuan Venus leh Serena Willams te chhang ni awm a ni a, thisen inzawmna nei lo mah se tennis-ah Williams unau ang thoin theihna sang tak a nei. US tennis star hi kum 19 mi chauh la ni nachungin US Open-ah a champion tawh a, French Open-ah final thleng tawhin Australian Open-ah semifinal a thleng leh ta bawk.

Gauff hian Grand Slam singles-ah match 48 a chak tawh a, kum 1990 aṭanga chhiarin US player kum 20 hnuai lam china a tluk loh chu Jennifer Capriati (50) leh Serena (49) te chauh an ni.

March 13, Ningani hian Gauff hian kum 20 a tling dawn a, Australian Open-a a champion theih chuan Capriati record a nihrual theih bakah Serena record a khum thei dawn.

Gauff tan match hnih chauh chak a ngai tawh a, chutihrualin a hmaah seeded no. 2 Aryna Sabalenka a awm tih hriat a ṭha. Chak ta reng pawh ni se, a khelh hmabak chu final a nih tawh dawn avangin chak a harsa dawn. Chutihrualin player ropui bik ni tur chuan match harsa bikah a chak a ṭul ṭhin reng a ni.