Hammers-in Kalvin Phillips an hawh dawn

West Ham chuan Manchester City aṭangin England midfielder Kalvin Phillips chu loan-in an hawh dawn a, tun season tawp thleng Hammers tan hian a khel ang.

Kum 28 mi Phillips hian July 2022 khan Leeds United chhuahsanin, City a zawm a, a man zat hi pound maktaduai 45 lai ni mah se Pep Guardiola enkawlna hnuaiah a khel phak meuh lo.

England international hi tun season-ah pawh City tan match hnihah chiah bul a ṭan a, a puanthuah a tel dawn ta. Juventus pawhin an thlithlai nia sawi midfielder hian tun kartawp hian West Ham-ah medical a nei ang a, a paltlang chuan London club tan a khel ang.

West Ham leh City hi an inbe fel vek tawh a, Phillips pawh hian harsatna a nei dawn lo nia sawi niin, kar khata £140,000 a hlawh chu Hammers hian pek an inhuam - a ngheta inlakluh theihna dan an ziak tel dawn bawk.

Premier League club lian ni tura indinthar mek Newcastle United pawhin English midfielder hi lakluh an duh a, mahse, City lam hian loan-a hawh man atan sum an phut hnem a, Magpies hi an inhnukdawk niin an sawi.

Phillips hian City tan a khel phak lo chungin England squad-ah erawh hmun a chang reng a, mahse, a khelh loh reng chuan Euro 2024-a inlan lo thei dinhmunah a ding - hei vang hian a khelh phakna tur Hammers pan hi a tan thutlukna fing a ni.

Manchester City chuan khawlum hnuaia training nuam zawk an neih theih nan Abu Dhabi-ah training an nei mek a, heta ṭang hian Phillips hi a transfer tifel turin a haw tawh.