Magpies-in Trippier an hralh phal lo

Bayern Munich chuan Newcastle United right back Kieran Trippier lakluh tum mah se, pound maktaduai 12.8-a an dawrna chu Magpies hian an lo hnar a, coach Eddie Howe chuan a defender pawimawh hi chhuahtir a phal lo.

Trippier hian January 2022 khan Magpies hi Atletico Madrid aṭangin a zawm a, a man zat hi £12mtd a ni - tunah kum 33 a ni tawh a, a aia toa Bayern-in an dawr chunga an hralh phal loh avangin Newcastle hian hralh an tum lo hle niin a lang.

Howe-a hnuaiah Trippier hian hmun pawimawh changin, Premier League club tan hian inelna hrang hrangah match 81 khel tawhin, goal thum a khungsak a, assist 18 a nei bawk - captain armband a hreng ṭhin a, Howe tan Trippier a chân a nih chuan a thlakna tur an vang dawn.

Newcastle hian Saudi PIF-in an lei avangin sum hman tur nei ngawt mah se, Premier League-in dan khauh tak a neih avangin an duh ang angin sum an hmang ngawt thei lo a, tun thlatir khan club chief executive Darren Eales chuan PL hnuaia dan zawm turin inhralh ṭhen an mamawh thu a sawi.

Premier League club-te hi an tlakchhiat loh nan club sum lakluh leh hman ral zat inmil turin dan hnuaiah khauh taka khuahkhirh an ni a, Magpies player zingah striker Callum Wilson chu AC Milan nena sawizawm niin, winger Miguel Almiron pawh Saudi Pro League club Al-Shabab nen sawizawm a ni.

Bayern hian nipui lai khan Harry Kane chu Tottenham Hotspur aṭanga la lutin, tun thlasik transfer-ah Spurs aṭang vekin defender Eric Dier an la lut bawk a, Thomas Tuchel-a'n English player bawk lakluh a duh.

Hetihrual hian Paris Saint-Germain right back Nordi Mukiele pawh an enthla thoa sawi a ni a, Trippier an la lut thei lo a nih chuan French defender lam hi an hawi chhunzawmin a rinawm.