Madrid-ah Spanish Grand Prix

Spain khawpui Madrid chuan kum 2026 aṭangin Spanish Grand Prix a thleng tawh dawn, tuna an tlan mekna Barcelona khawpui aiah Madrid an hmang tawh dawn tihna a ni.

Spanish Grand Prix hi kum 1913 aṭanga tlan tawh kha niin, tun hma chuan Madrid khawpuiah pawh hian an tlan tawh ṭhin. A hnu lamah chuan Jerez, Andalucia-ah kum 1986-1990 kha an tlan a, chumi hnuin Circuit de Barcelona-Catalunya-ah kum 1991 aṭanga tun thlengin an la tlan.

Madrid khawpui hian kum 1981 hnua a vawi khat nan F1 a thleng leh dawn a ni a, inremna hi kum 2035 thleng daih a ni. F1 thuneitu lamin boruak thianghlim lo ti chhuak tlem zawnga hmalak an tum mek bawk a, kum 2030-ah chuan mihring tana boruak ṭha lo tel loa inelna hmachhawn tumin an bei mek - Madrid hian chumi hun chu a huam thleng dawn tihna a ni.

F1 thuenitu lamin a tam thei ang ber intlansiak neih an duh. Spanish Grand Prix tlanna sawn mah se, tuna an tlan mekna Barcelona hian inelna dang a thlen theih dan tur ngaihtuah mek a ni bawk. F1 President leh Chief Executive Officer ni bawk Stefano Domenicali chuan Barcelona kalsan loa tih theih an duh thu a sawi.

Spanish GP an tlanna tur hi 5.47km a thui niin, kawngkawi 20 a awm dawn. A hmunah entu mi 110,000 an awm thei a, inelna tak neih hmain mipui leng zat hi 140,000 vela tihsan an tum, an tihlawhtling a nih chuan F1 a hmuna entu tam theihna berte zinga mi a ni ang.