Arsenal chairman Keswick a chawl

Sir Chips Keswick chu Arsenal chairman a nihna aṭangin a chawl ta. Premier League club board-ah hian member pali Josh Kroenke, Philip Harris, Ken Friar leh Keswick te hi an awm ṭhin a ni.

Kumin February thla khan Sir Chips hian kum 80 a tling tawh, 2005 aṭang khan Gunners board-ah hian awmin 2013 aṭang khan chairman nihna hi a chelh - tun hnai kum 15 chhung chu thuneitu lu zingah a tel.

Sir Chips chuan, "Arsenal hian ka thinlungah hmun pawimawh tak a chang a, a chang kumkhua tawh bawk ang. Hun rei tak chhung he club hruaitu ka ni thei kha ka lawm takzet.

"A tira ka ruahman dan chuan tun season tawp ruala chawlh tum kha ka ni, mahse hripui leng vangin harsatna hrang hrang a thleng a, league pawh a hun pangngaia khelh zawh theih a ni lo," a ti. Hun kal zel tur atana club chu dinhmun ṭha takah a ding tih a sawi bawk.