Olympic khel tur zingah James leh Curry

United States chuan Paris Olympic 2024 neih turah basketball team ṭha tak tirh a tum a, player 41 a thlan chhuah chhin zingah LeBron James leh Stephen Curry te an tel a, gold medal lak ngei an tum tih a nemnghet.

Paris khawpuiah hian player 12 chauh an zin dawn, tuna an thlan chhuahte hi an la thlifim chho leh zel dawn a ni. Player koh chhin zinga 28 te chu US tana Olympic emaw FIBA Basketball World Cup emaw khel tawh an ni a, an zinga 23 chu heng inelna pahnih zinga khawi emaw zawka medal la tawh an ni hial.

United States hian a zawnin Olynpic vawi li chu mipa basketball huangah gold medal an la thei, mahse nikum khan Basketball World Cup-ah palina dinhmun an luah, kumin Olympic-ah hian awlsam taka champion ngawt theih a ni dawn lo tih a lang, chuvangin player ṭha leh langsar an ko hi thil mak a ni hran lo.

Team USA managing director Grant Hill chuan, "Player ṭha tak takin 2024 Olympic Summer Games khelh an châk, ram tana inlan châk kan ngah hian min tilawm. Olympic champion nih ngei tumin theihtawp kan chhuah dawn a ni," a ti.

NBA champion vawi li ni tawh James hian 2012 London Olympics-ah khan US hi gold medal a lakpui a, a hnu lamah ram tan a la inlan leh lo. Hetihlai hian Curry erawhin Olympic a la khel ngai miah lo thung.

James leh Curry te bakah hian Kevin Durant, Anthony Davis, Jimmy Butler, Paul George Kyrie Irving leh Joel Embiid te hming a lang bawk, ṭha taka an khel ho thei a nih ngat chuan ram dang tan hmachhawn an harsa dawn.