Copa del Rey semifinal khel tur Sociedad

Spanish football-a team hmuhnawm ber pawl Real Sociedad chuan Copa del Rey semifinal an lut a, nimin zing khan an mikhualna ramah Celta Vigo chu 2-1 in an hneh.

Sociedad tan hian player chhuanvawr Mikel Oyarzabal chuan minute hnihna lekah goal hmahruai a khung a, kum 26 mi forward hian tun season inelna hrang hranga goal 12 a khungna chiah a ni.

Hetah hian an duhtawk mai lo - Real Sociedad tana a match hmasa berah Sheraldo Becker chuan goal khung nghalin, a team hi 2-0 in hma a hruaipui. Kum 28 mi forward hian January 18 khan Union Berlin aṭangin Sociedad hi euro maktaduai thumin a zawm a, Spanish football-ah a tlangnel hma hle.

Celta Vigo tan Luca de la Torre chuan goal khung ve mah se, goal a khung hian hun pek belh a ni tawh a, thawhlehna hun a awm tawh lo - Sociedad an chak a, semifinal an lut.

Nizan khan quarterfinal inkhel dangah Real Mallorca leh Girona inkhelin, an result kan hre hman lo a, tukin zing dar 2:00 khan Athletic Bilbao leh Barcelona an inkhel bawk.

Zanin dar 1:30-ah quarterfinal match khat khelh tur a awm dawn a, Atletico Madrid chuan Sevilla an mikhual ang.