Serie A chhunzawm hun tur June 20

Italy sports minister Vincenzo Spadafora chuan an ramah nun dan phung pangngai an hman ṭan thu a sawi a, ram chhunga football inelna sang ber pawh thla thum an chawlh hnuah June 20 aṭangin an khel chhunzawm leh ang.

League khelh chhunzawm a nih theih nan hian sorkar hnuaia Technical and Scientific Committee (CTS) chuan Italian Football Federation (FIGC) rawtna a pawm, hun rei tak ngaihtuah a nih hnuin Ningani zan khan an thutlukna hi an puang a ni.

Sports minister Spadafora chuan, "Italy ram chu nunphung pangngaiin a nung leh ṭan, football pawh a kalphung pangngaiin a kal thei dawn. FIGC chuan ruahmanna pakhat an neih bakah a dang pahnih B leh C pawh an la nei.

"Ruahmanna fel tak leh thuawihna avangin June 20 aṭang chuan a inkhelh leh theih tawh ang," a ti. League thuneitu lam chuan Serie A hi August thla tawpah khelh zawh a nih tur thu an lo sawi lawk tawh bawk.

Italy hi coronavirus vanga buai nasa ber zinga mi an ni, nimin tlai thleng khan hripui vang hian mi 33,000 chuang an thi tawh. Tun hnaiah erawh hri kai thar leh thihpui an tlahniam zel a, football tan pawh hun ṭha a inherchhuah phah.

March 9 khan Sassuolo chuan Brescia 3-0 in an hneh a, chawlh lailawk hma lama inkhel hnuhnung ber a ni; an chawlh hma pawh hian match hnuhnung lam ṭhenkhat chu a hmuna entu awm loin an khelh a ngai hman hial.

Serie A club tam zawk chuan match khelh hmabak 12 an la nei, team pariat erawh chuan match 13 khelh tur an la nei thung - khelh tur ngah zingah hian pathumna Inter Milan pawh an la awm, champion an la beisei thei zel tihna a ni.

League match an khelh hma hian Italian Cup chu khelh tum a ni, June 13-14 hian semifinal an khel ang, a hmawr bawkna leh nomawi inchuhna ni bawk chu June 17-ah khelh tur a ni thung ang.

Italian Cup semifinal-ah hian Inter Milan leh Napoli an inhmachhawn dawn, inkhel dangah AC Milan leh Juventus an intawng thung ang; club lian leh a ṭha pali an la dam avangin inelna hi a ngaihnawm dawn.

European league lian panga zingah German Bundesliga chu khelh chhunzawm a ni tawh, English Premier League leh Spanish La Liga pawh June thla chhungin an khel chhunzawm dawn. French Ligue 1 erawh hri leng vang hian an titawp fel tawh.