Federer dinhmun a ṭha

Roger Federer chuan pangngai taka tennis khel tur chuan an nghah rei a la ring a, tun dinhmunah inkharkhip chu taksa leh rilru tih hriselna hun atan ṭha taka a hman mek thu a sawi.

Swiss star hi Covid-19 len hma khan a inhliam, hliam vanga a inkhelh theih loh hnuah inkharkhip zui a ni; player dang an inkhelh theih bik loh avangin a ranking pawh a ngaiah a din theih phah - a tan hun ṭha liam mah se kawng lehlam zawnga thlir chuan chanchin ṭha a ni tho.

Grand Slam vawi 20 champion tawh Federer chuan, "Ka taksa dinhmun a ṭha a, tennis ṭha taka khel turin kawng zawh thui a ngai tawh lo. Chawlh chhungin ka insawizawi nasat bakah rilru lam pawh hahdam takin ka awm.

"Mahse tournament khel tur erawh chuan hri leng a ziaawm hun nghah a ngaih hmel, mahni duh hun huna lo inkhelh ngawt chu a fuh rih lo ang. Remchang hmasa bera inkhel turin nasa takin ka inbuatsaih mek a ni," a ti.

Federer-a coach Severin Luthi pawhin ball vuak hnem a ngaih thu a sawi. Luthi chuan, "Roger hian a dinhmun ngai awh leh tur chuan a tam thei ang ber ball a vuak a ngai, ka ngaihdan chuan tournament khel tura inbuatsaih nan hun a ngah tawk," a ti.