Australian Open Semifinal : Djokovic vs Sinner - Medvedev vs Zverev

Novak Djokovic-a'n a lal ram venhim a tum a, player dang pathum Jannik Sinner, Daniil Medvedev leh Alexander Zverev ten Melbourne Park aṭangin Novak nekchhuah an tum thung - player ṭha paliten Australian Open nomawi an inchuh mek.

Tennis season khat chhunga Grand Slam hmasa ber hi a hmawr bawk a hnai, vawiin hian mipa singles semifinal pahnih khelh a ni dawn. Chawhma dar 9:00-ah champion lai Djokovic leh Sinner ten final lut tur zawk an chingfel ang.

Chawhnu lamah, ruahman chhin dan chuan dar 2:00-ah Medvedev leh Zverev te an inkhel ve leh thung ang. Australian Open 2024 hi Mizoram aṭang chuan Sony Sports Ten 3-ah live-a en theih a ni.

Djokovic vs Sinner

Theih ni se la chuan Jannik Sinner hian Australian Open nomawi vawi 10 chawi tawh Novak Djokovic hi hmachhawn rih loh a duh mai thei, mahse a hmaah a din a ngai miau sia - a tana fiahna hautak ber a hmachhawn dawn.

Italian tlangval Sinner-a'n season hmasa ATP Finals-ah khan Djokovic hi a hneh thei a ni tih a lo lantir tawh, mahse nomawi inchuhna inkhel pawimawhah a ngam lo leh ta zawk, tun ṭumah hian huai zawk nih an inchuh leh dawn ta chiah.

Melbourne Park a nih tawh chuan Djokovic hi hneh theih loh ang mai a ni. Chutihrualin, kumin bikah Dino Prizmic, Alexei Popyrin leh Taylor Fritz ten a service an chhuhsak zat chu vawi riat a ni, hei hian chesual thei a ni ve tho tih a nemnghet.

Serbian star hi kum 36 mi a ni tawh a, semifinal thleng tur hian court chhungah darkar 15 leh minute kua a hmang, a khingpui tur Sinner hian darkar 11 leh minute 22 chauh a hmang thung, a kum naupang zawkin thahrui a la khek hnem zawk bawk.

Kum 22 mi Sinner-a'n set a la hloh miah lo a, a khel ṭha hle tih a chiang - chutihrualin semifinal kalkawngah hian Andrey Rublev bak chu player hmachhawn harsa tak tur a la tawng lem lo, tunah chuan Djokovic a nih tawh dawn avangin boruak a danglam dawn.

Tawnhriat neih tam lamah chuan player pahnih hi khaikhin chi an ni lo. Djokovic-a'n Grand Slam title 24 a neih tawh laiin Sinner tan major tournament semifinal vawi hnihna tur chauh a ni, tun tournament an khelh danah erawh tu zawk zawk pawhin chak turin theihna an nei.

Medvedev vs Zverev

Daniil Medvedev leh Alexander Zverev te hian awlsam takin semifinal an thleng lo ve ve. Quarterfinal khelh zawh thleng khan court chhungah darkar 16 chuang an hmang, kar hmasa aṭanga inelna neih tawhah thahrui an hmang hnem tawh hle.

Medvedev hi hard court-a inkhel thiam a ni; Australian Open final pawh vawi hnih khel tawhin US Open champion a ni tawh bawk. Kum 27 mi ni tawhin a vanglai a ni a, tun hunah hian a champion lo a nih chuan a tan hun ṭha dang a tam tawh kher lo ang.

Russian tlangval hian a service ṭha tak a chhawr ṭangkai ṭhin a, chutihrualin tun tournament kal laiah vawi 18 ngawt a service a hloh tawh. Semifinal chinah chuan vawi khat hloh lek pawh a pawi dawn - ni dang aia a rilru a tihpaukhauh zual a ngai dawn.

Service kan sawi a nih chuan Zverev hi sawi hmaih a thiang lo. German tlangval hian Carlos Alcaraz a hneh zawh thleng khan vawi 73 zet aces a siam tawh, 6ft 6in a sang tlangval service hi player dang tana hmachhawn châkawm loh tak a ni.

ATP Finals champion a ni thei a, Olympic gold medal a la tawh bawk - inelna hlu pahnih hi best of three hmanga khelh a ni. Theihna nei sang mah se Zverev hi a dawhthei tawk lo ṭhin, hei hi Grand Slam lama a hlawhtlin theih loh chhan ni pawhin a lang.

Australian Open 2024-ah chuan Zverev hi a danglam ta, set nga leh set li khelhna match pahnih ve ve a nei, hengah te hian puitling takin a inthunun thei. Inthunun theihna hi Medvedev lakah pawh a mamawh dawn - kum 26 mi tan chak tur chuan dawhtheihna a ngai dawn a ni.