Carlos Alcaraz a tla

Australian Open khelh hma khan Carlos Alcaraz hi champion tura rinkai zinga mi a ni a, a champion a nih chuan Novak Djokovic nek chhuakin world number 1 a ni thei dawn bawk. Mahse, heng thil hi tun ṭumah chuan a thleng ta rih lo.

Nilaini tlai quarterfinal inkhelah world number 2 Alcaraz hian Alexander Zverev chu 6-1, 6-3, 6-7 (2-7), 6-4 in a hneh lo. Alcaraz a tlak avang hian world ranking chhuak tharah Djokovic chu a chung berah a awm leh dawn tih a chiang.

Kum 20 mi Alcaraz chuan, "Ka khelh ṭhat ber ṭum a ni lo, a bul kan ṭan fuh loh em avangin insiamṭhat kha a harsa. Ka service leh ball vuak dangte kha a ṭhenkhat a ṭhat em em laiin a ṭha rei thei tlat lo a, nghelnghet taka khel tan lo chuan a chak theih loh.

"Tun ṭuma ka khelh dan hi chu a nihna takah chuan a zahthlak, hetiang mai maia khel tur hi ka ni lo. He hmunah ngei hian tun aia ṭha zawkin ka lo kir leh ngei ang tih ka tiam che u," a ti a, a chet fuh lohna hmunah thawh leh ngei a tum.

Alcaraz hian US Open leh Wimbledon title a la tawh a, a kum ngaihtuah chuan a hlawhtlinna chan tawhte a lian. A lakah beiseina pawh a sang, mahse inbuatsaihna pawh nei hman miah loin Australian Open a khel - a tan thil a awlsam vek bik lo a ni.