Mizoram khingpui tur Haryana

Khelo India Youth Games 2023 hmeichhe hockey semifinal-ah Mizoram leh Haryana te an inhmachhawn dawn. Inkhelhna hmun tur hi Mayor Radhakrishnan Stadium, Chennai a ni a, dar 10:00-ah match ṭan a ni ang.

Mizoram hian Madhya Pradesh hneh loin bul ṭan mah se Tamil Nadu (7-0) an sawp hnuah Chattisgarh chu 3-1 in an hneh a, medal beiseina an chhi nung.

Mizoram manager R. Lalnunmawii chuan, "Haryana hi group B pakhatna a ni a, kan group-a awm Madhya Pradesh te ai pawhin an ṭha zawk ang. India junior camp-a awm player 4-5 an kawl ve a, team ṭha tak an ni. Chutihrualin keini pawh team ṭha tak kan ni a, kan hneh theih ngei pawh kan inring," tiin Vanglaini a hrilh.

SYS coach Lalroṭhuami (coach) leh manager Mawii ten Mizoram team hi an ho a, player tam zawk hi SAI Hockey Centre, Thenzawl-a inzir an ni a. Mizoram junior core group-a awm mek F. Lalbiaksiami, Lalthantluangi leh Lalrinpuii te chu team tan an ṭangkai ṭhin hle.

Mizoram hian kumin Khelo India-ah hian boxing aṭangin bronze medal pakhat an hlawh chhuak tawh a, hei hi medal lakchhun a la ni. Hockey hmangin Mizoram tan medal dang lak beiseina a la inhawng.