Champion lai Sabalenka a tlang

Australian Open hmeichhe singles champion lai Aryna Sabalenka chuan a nomawi kawl lai humhim turin match khat chak chauh a hmabak ta. Nimin tlai semifinal inkhel hmuhnawmah Coco Gauff hnehin final a lut.

Rod Laver Arena, Melbourne Park-a inkhelah Sabalenka hi a chungnung nghal bik mai lo, mahse hun pawimawh laiah a tawnhriat neih ṭhat chhawr ṭangkaiin darkar khat leh minute 42 an inkhelh hnuah 7-6 (7-2), 6-4 in a chak.

American tleirawl Gauff-i'n set khatna lak theihna remchang ṭha tak a nei, 6-5 a hma hruai chungin a service. Amaherawhchu, ama service a hum thei lo a, tie break khelh zui niin a tihsual vangin point hnih a chan a, a tho chhuak thei ta lo a ni.

Nizan khan Zheng Qinwen leh Dayana Yastremska ten semifinal hnuhnung zawk an khel zui a, a chak zawkin Sabalenka nen nomawi an la inchuh zui leh dawn a ni - hmeichhe final hi Inrinniah khelh tur a ni ang.

Kum 25 mi Sabalenka chuan, "Coco kha a che vel a fuh a, a tlan tamin sir taka ka vuak pawh a rawn vaw let thei zel - point khat leh hmuh belh pawh kha a harsa ṭhin. Hetiang inkhelah chuan mahni game pangngai khelh chhuah theih hi a pawimawh.

"Ka chak emaw chak lo emaw pawh ni se la inkhel hautak leh ropui tak a ni ka ti, nakinah chuan Coco nen hian match hautak dang pawh kan la khelh leh ngei ka ring," tiin a chak lo zawk ni mah se Gauff a dahsang thiam hle.

Gauff hi kum 19 mi chauh a la ni a. khawvel hriat a hlawhna erawh a rei leh deuh tawh. US Open champion lai a ni a, tunah chuan inkhelh nuam a tihna tak pakhat French Open inbuatsaih turin a rilru a hman chhunzawm a ngai dawn a ni.