League Cup final khel tur Liverpool

Fulham khelmualah Liverpool-in hnehna chang zo lo mah se, League Cup final an lut tho - Reds hian Nilaini zan khan League Cup semifinal second leg-ah Fulham an lenchilh a, 1-1 in an inhnehtawk.

Mahse, Jurgen Klopp-a naute hian first leg-ah 2-1 in hnehna an lo chang tawh a, inkhel pahnih belhkhawmah 3-2 a hnehna changin, League Cup final an lut - February 25 zanah Chelsea nen champion an inchuh ang.

Craven Cottage-a semifinal second leg-ah Liverpool hian Luis Diaz hmangin goal hmahruai an khung a, awlsam taka chak tur angin lang hman mah se beisei ang ngawtin a awlsam lo - Fulham tan Issa Diop chuan si phurh a sut a, Liverpool an ṭang tlang thei hram.

Diaz-a thiamna

Salah awm loh thu vawi tam kan sawi tawh a, mahse, Fulham lakah pawh Klopp-a'n Cody Gakpo, Darwin Nunez leh Diaz a inkawptir theih avangin Liverpool hi goal khung lamah chuan ngaihtuahawm an ni lo.

Minute 11-na lekah Reds hian goal an khung nghal a, a khungtu chu Luis Diaz a ni. Colombian forward hian Jarell Quansah-a ball pek chu a awma la thlain, Fulham defender pahnih ven karah a khung a, player thiam bik aṭanga chhuak a ni.

Reds hian chance dang pawh an nei nual a, vawi 14 ngawt shot neiin, vawi nga chu target-ah a kal. Mahse, Bournemouth laka goal hnih khung hlim Nunez ke hmui zan a ni lo a, chance ṭha a neih a hlah nual.

A uiawm

Fulham pawhin sawi tur tam tak an nei - uiawm taka khung loh an nei nual a, an vanneih zan ni se Reds hi extra time khelhpui thei hial tur khawp an ni. Mahse, an vanneih zan a ni lo a, first leg-a Anfield-a an tlawm an tuar tel.

Cottagers tan Liverpool academy chhuak Harry Wilson che vel a hmuhnawm a, an si phurh sutna goal pawh a thawhchhuah a ni. Tun season inelna hrang hranga goal thum leh assist vawi sarih nei tawh Wilson hian Caoimhin Kelleher-a goal venah uiawm takin a khung lo bawk.

Fulham tan Andreas Pereira chuan post a pet per bawk a, mualneitu hian an vanduaina zawn an thlir chuan sawi tur tam tak an nei - a tawpah Liverpool an tlang a, League Cup final an khel dawn.

Squad a chhah

Liverpool tan hliam vanga a chawlh reng hnuah Andy Robertson chu squad-ah hmuh tur a awm leh ta a, mahse, Scottish defender hi bench lamah a ṭhu tluan - Klopp-a'n game level sangah pawh player naupang a ring ngam ṭhin a, an chet ṭhat phah tiin a sawi theih.

Merseyside club hian tun season-ah ringawt vawi 191 ngawt player an thlak kual tawh a, Premier League club dang zawng aiin vawi 56-in a tam - Fulham lakah pawh kum 18 mi right back Conor Bradley chuan bul a ṭan a, a laia Virgil van Dijk nena ding chu kum 20 mi Quansah a ni.

Left back-a khel Joe Gomez pawhin tlarhnungah chuan khawiah pawh a rintlak tih a tarlang nawn a, midfield-a bul ṭantu Harvey Elliott pawh kum 19 mi chauh a la ni a, Klopp-a'n a hmanraw neihte a chhawr thiam ṭhin hle.

Klopp a hlim

Liverpool boss Jurgen Klopp chuan, "Kan dressing room in hmu lo zawk a nih kha. Kan player naupang tak takte chu final an luh avangin hlimin an khat a ni," a ti a, player naupang zawkte tan final luh chu a hlut lehzual thu a sawi.

Klopp hian bench aṭangin kum 18 mi midfielder Bobby Clark a luhtir bawk a, Curtis Jones pawh bench aṭanga lutin, a hming hre bel viau tawh mah ila, ani pawh hi kum 22 mi chauh a ni - Liverpool player an naupang tlang hle.

Klopp chuan, "Wembley chu kawr pawl leh sen nen a khat dawn a, a phurawm khawp mai. Fulham lenchilh hnua final kan lut thei hi lawmawm ka ti - minute 30 hnuah khan beisei kan phak lo deuh a, theihtawp kan chhuah zui a ṭul. Wembley-a final khelh kan nghakhlel tawh khawp mai," a ti a, Chelsea nena champion an inchuh tur a thlirlawk der.