Copa del Rey - Beisei tur nei tawh lo Barca

Barcelona boss Xavi-a'n Spanish Super Cup final-a Real Madrid ngam loa an mualpho hnu lawkah, "Nomawi chawi theihna pathum kan la nei," tiin a inhnem a, kar khat a liam hman awrh a, nomawi pahnih bak an hmaah a inchhawp ta lo.

Barca hian Nilaini zan khan Copa del Rey quarterfinal-ah Athletic Bilbao an lenchilh a, 4-2 in an tlawm - Barca tan Robert Lewandowski leh Lamine Yamal ten goal khat ve ve an khung a, Bilbao-in Gorka Guruzeta, Oihan Sancet, Inaki Williams leh Nico Williams hmangin an khung thung.

Mikhualna ramah Barca an tlawm a, La Liga leh Champions League chiah beisei tur an nei ta. Nilaini zan quarterfinal inkhel dangah Real Mallorca chuan La Liga hmahruaitu Girona chu 3-2 in an hneh a, nizana Atletico Madrid leh Sevilla inkhel result erawh kan hre hman lo.

Barca veltu

Inkhel ṭan aṭanga minute khatna lekah Bilbao-in Gorka Guruzeta hmangin goal hmahruai an khung a, mahse, Barca hian an thiampuipa Lewandowski hmangin minute 26-na lekah an chhanglet nghal - Yamal chuan minute ruk hnuah hmahruaina goal a rawn khung zui bawk.

Hetihlai hi chuan Barca hi awlsam takin an chak zui mai tura ngaihna a lian hman a, Bilbao ngaihdan erawh a ni ve lo. Barcelona boss hlui Ernesto Valverde enkawl team hian Catalan club hi tihnat an duh a, Copa del Rey aṭanga petchhuah an châk.

Chu an duhna thinlung chu khelmualah a takin an lantir a, Sancet hmangin minute 49-naah si phurh an sut. Minute 90 chhung goal dang a luh loh avangin extra time khelh a ni a, Williams unauin Barca an vel - Inaki leh Nico ten goal khat ve ve khungin, Bilbao an chakpui a, Copa del Rey semifinal an lut.

A thlawn mai maw

Yamal-a'n goal a khung chiah khan Copa del Rey-a goal khung thei naupang ber record a siam nghal a, Spanish rawlthar ṭhangduang hi kum 16 leh ni 195 mi niin, kum 2010-a Malaga forward Juanmi Jiménez-a'n kum 16 leh ni 238 mi nia record a lo siam tawh chu a khum.

Yamal hian goal a khung a ni satliah lo a, ṭha zeta ball a tlan luhpui hnuah mawi takin a khung - youth league khel rual lekin puitling kara a game khelh dan hi awihawm lo khawp a ni. Mahse, Yamal tan ni a chhuak reng bik lo a, Bilbao keeper Julen Agirrezabala a bum vek hnua goal ruaka a khung loh kha khung ngat se semifinal-ah Barca a hruai thleng ni mai tur!

Barca tan tun season-a match 28 zet khel tawh forward hian inthiam lo takin, "Kan theihna zawng zawng kan hlan a, ka tihsual vangin ngaihdam ka dil a ni," a ti a, coach Xavi chuan, "2-2 a nih laia kan chance kan chhawr lo kha ka ui ngei a, mahse, demna tur a awm lo. Kum 16 mi, ropui taka khel a ni a, chance pawh kha ama insiam a ni," a ti a, a player chu a chhan.