FA Cup fourth round : Villa hmaah Chelsea; Spurs Vs City

FA Cup fourth round-ah Premier League team ṭha an inhmachhawn nghal dawn. Zanin dar 1:15 hian Chelsea-in Aston Villa an mikhual ang a, dar 1:30-ah Tottenham Hotspur leh Manchester City te an inkhel bawk ang.

Mauricio Pochettino kaihhruai Chelsea hi League Cup semifinal thleng hlim an ni ngawt lo a, Middlesbrough laka goal ruk khung thei an ni. Blues an inhrosa ṭan a, Unai Emery kaihhruai Villa lakah fiahna an hmachhawn dawn.

Fiahna chu

Nikum September 24 khan Chelsea hian Aston Villa hi an mikhual tawh a, Poch-a hoten Emery hote tawhkhirhzia an hria. Stamford Bridge-ah Villa-in Oli Walkins goal hmangin hnehna an chang.

Chutihrualin Blues hian chhuanlam an siam duh a nih chuan Malo Gusto hnawhchhuah an tuar a, player 10-a an khelh hnuah goal hi an chhuah. Tun ṭumah erawh kim leh kim an inkhel dawn.

Chelsea hian tun ṭumah pawh chhuanlam tur chu an nei tho a, League Cup semifinal leh FA Cup match inkarah darkar 72 chauh a awm. Christopher Nkunku (mawng bawr), Lesley Ugochukwu (malpui), Marc Cucurella (ke rek), Robert Sanchez (khup), Wesley Fofana (khup), Romeo Lavia (malpui) leh Reece James (malpui) te an la inliam vek a, Nicolas Jackson pawh AFCON khelin a la zin chhuak mek bawk.

Mahse, Boro lakah Blues hian kim loin ṭha takin an khel tawh a, London club hian an squad chhah hlawkna an hmu chho mek. Midfield-ah Moises Caicedo leh Enzo Fernandez te an inkawptir thei a, mual sir aṭanga nawr turin Raheem Sterling leh Mykhailo Mudryk te an awm a, mual laiah Cole Palmer leh Armando Broja te an la awm thei. Team ṭha tak an ni.

Villa hian FA Cup fourth round lut tur hian League Cup-a Chelsea hneh Boro an hneh a, replay khelh ngai loin Riverside Stadium-ah 1-0 in an chak. January 14, Pathianni khan Everton nen goal awm loin an inhnehtawk a, hemi hnu hian Villa hi an hahdam ṭha. Emery hoten Chelsea hmachhawn turin inpuahchahna hun an nei ṭha a, Blues hmabak a harsa ang.

Spurs Vs City

Chelsea leh Villa te inkhel tur ai mahin Tottenham leh Man City te inkhel tur hian thawm a nei ring zawk. Nikum December 3 khan City leh Spurs te hi 3-3 in Etihad Stadium-ah an inhnehtawk a, tun ṭuma an inkhelhna tur erawh Tottenham Hostpur Stadium a ni dawn.

Ange Postecoglou hoten beiseina sang tak an nei dawn a, January thlaa an player lakluh forward Timo Werner leh defender Radu Dragusin ten phurhna a pe belhchhah bawk ang. Mahse, Spurs hian Son Heung-min bakah Yves Bissouma leh Pape Matar Sarr te ram tana an khelh avangin an chhawr thei dawn lo.

Manchester City erawh Kevin de Bruyne an chhawr thei leh tawh a, Belgian midfieder hian Newcastle United lakah hnehna a chanpui. Pep Guardiola hote hi Erling Haaland tel loin an khelh a la ngai dawn a, mah se De Bryune-a'n a ho tawh dawn vangin Spurs lakah pawh a buk rit zawk an ni ang.