Khalid-a 'magic' a bo

Jamshedpur FC-in Khalid Jamil an lak hnua an match hmasa pathumah hnehna an chang vek a, mahse, Aizawl FC boss hlui enkawlna hnuaiah a chak reng theih bik lo - Nilaini zan khan Indian Super Cup semifinal-ah East Bengal nen an intawng a, 2-0 in an tlawm a, Kolkata club-in final an lut.

Inkhel ṭan aṭanga minute 19-naah East Bengal hian goal an khung nghal a, Cleiton Silva-a corner pet ṭha tak chu Saul Crespo chuan lo chang fuhin, Spanish midfielder hian mahni hmasial lo takin Hijazi Maher tan a siamsak - Jordanian defender tan goal-a chantir turin harsatna a awm tawh lo.

Goal dang lut loin chawlhlawk hman a ni a, second half ṭan aṭanga minute hnihna lekah East Bengal bawkin goal an khung nawn. Nishu Kumar chuan ball a tlan luhpui hnuah Javier Siverio tan a siamsak a, kum 26 mi Spanish striker hian goal-ah a chantir.

Men of Steel-in hun tawp thlengin a chhanna tur an nei lo a, 2-0 in East Bengal an chak - Aizawl FC a enkawl laia I League chanchina Indian coach hlawh hnem ber ni tura thlem chhuak a, a hnua bantu East Bengal lakah Khalid-a'n phuba lakna chance nei mah se, a chhawr lo.

Jamshedpur tan hian PC Laldinpuia chu bench aṭanga luhtir a ni a, East Bengal-ah Mizo player inlan an awm lo. Nizan khan Mumbai City leh Mizo pakua neitu Odisha FC te chu semifinal dangah an intawng a, an result kan hre hman lo.