AFCON - Last 16 lut a hriat kim

Africa rama football inelna sang ber Africa Cup of Nations group stage chu khelh zawh a ni ta. Team 24 aṭangin team 16 an la dam a, tla zingah Tunisia, Zambia leh Tanzania te an tel. Inelna thlengtu Ivory Coast erawh Morocco-in Zambia an hneh zarah last 16 khel turin an tling hram.

Equatorial Guinea, Nigeria, Cape Verde, Egypt, Senegal, Cameroon, Angola, Burkina Faso, Mali, South Africa, Morocco leh DR Congo te chu an group-a pahnihna china an awm vangin last 16 khel turin an tling a; inelna thlengtu Ivory Coast bakah Guinea, Namibia leh Mauritania te chu pathumna ni chungin an tling.

Beiseina thar

Ivory Coast-in group match hnuhnung berah Equatorial Guinea chu 4-0 ngawtin an hneh lo. Nigeria an hneh tawh loh bawk avangin pathumnaah an awm a, tla tura ngaih an ni. Inkhelh banah head coach Jean-Louis Gasset pawh an ban nghal.

Mahse, January 24, Nilaini zan khan group match tawp berah thil danglam a thleng. Inkhel pali ngawt awm mah se goal khat chiah a lut. Group E-ah Hakim Ziyech-a'n Morocco tan Zambia lakah goal awmchhun a khung a, 1-0 in an chak.

Inkhel dangah Tanzania leh DR Congo te an inhnehtawk bawk avangin Zambia hi pathumnaah an awm a, point hnih chauh an hmu. Hei hian Ivory Coast beiseina thar a siam a, pathumna ni chungin knockout stage an lut.

Engtin zel?

Ivory Coast hian January 29, Thawhṭanni zanah champion lai Senegal an hmachhawn dawn a, manager Jean-Louis Gasset an ban hman avangin manager lailawk Emerse Fae hoin an khelh a ṭul dawn.

Senegal hi champion lai an ni ngawt lo a, group match zawng zawng chak vek an nih avangin Ivory Coast tan mualphona thuah hnih a ni thei. Equatorial Guinea laka goal li ngawt an chhuah avangin an mualpho tawh a, Senegal lakah hian an tlarhnung an tihphui a ṭul tawh ang.

Chutihrualin Ivory Coast mipui erawh an lawm a, last 16 an tlin avangin stadium sir, hotel leh khawtthlerah an lam suau suau a ni ber. Senegal an hmachhawn zawhah an hlim zel ang em, tih hi zawhna awm thei chu a ni.