Deloitte Money League : Treble champion City chungah Real Madrid

Sum lam zirchiangtu rintlak Deloitte zirchiannaah Real Madrid chu 2022-23 season chhunga sum la lut hnem ber an ni a, kum hmasa lama pakhatna Manchester City an rawn lehpel. Chutihrualin club pahnih inthlauhna hi a zim hle.

Real Madrid hian sum lakluh lamah record thar an siam a, 2022-23 season chhung khan euro maktaduai 831 (£710m) zet an la lut. City-in nomawi lian pathuam Champions League, Premier League leh FA Cup an champion zarah euro maktaduai 826 (£705.6m) an la lut ve bawk a, English club hian season liam ta aiin la lut tam bawk mah se Los Blancos lakluh a pun nasat em avangin pahnihnaah an lungawi a ṭul.

Club lian 20 lakluh chu season hmasa lam aiin 14% ngawtin a pung a, pawisa ang zawng chuan a punna hi euro tluklehdingawn 10.5 (£8.97bn) a tling pha daih. Hetah hian commercial aṭanga an lakluh €4.4bn leh inkhelh ni aṭanga an sum hailuh €1.9bn te a tel a ni.

Liverpool sum lakluh chu danglam hret mah se Reds hi pathumna aṭangin pasarihnaah an tla thla. Jurgen Klopp-a hote chungah hian Real Madrid leh Man City bakah PSG, Barcelona, Man United leh Bayern Munich te an awm.

Premier Legue club Tottenham Hotspur, Chelsea leh Arsenal te chu a sang 10 zingah an tel thei a, Newcastle leh West Ham te pawh 17-na leh 18-naah an awm thei bawk. Leicester City, Leeds United leh Everton te erawhin top 20 an chhuahsan thung.

Top 20 zingah hian club pathum Hammers, Liverpool leh Atletico Madrid te chauh chu an sum lakluh a hniam zawngin a kal. A tawi zawng chuan club lian ho sum dinhmun a ṭha tiin a sawi theih.