Srikanth leh Prannoy chak lo

Indonesia Masters Super 500 badminton tournament khelh laia mipa singles player Lakshya Sen leh Kiran George ten second round an luh laiin HS Prannoy leh Kidambi Srikanth te erawh hneh nei loin an match hmasa berah an tla nghal.

Sen-a hi tunah world number 19 a ni a, nipui laia neih tur Paris Olympic khelh phak ngei tuma bei lai a ni. Malaysia Open match hmasa bera a ngam loh Weng Hong Yang nen bawk an intawng, tun ṭumah erawh 24-22, 21-15 in a chak zawkah a ṭang.

Kum 23 mi George-a pawhin game hmasa ber hloh mah se, a khingpui Toma Junior Popov chu 18-21, 21-16, 21-19 in a hneh. 2022 Odisha Open leh 2023 Denmark Masters title la tawh hi Prakash Padukone Badminton Academy aṭanga inzir chhuak a ni.

World number 8 Prannoy erawhin beisei a phak lo. Indian Open semifinal khel zo hlim hlawt hian world champion pawh lo ni tawh Loh Kean Yew chu 18-21, 21-19, 10-21 in a hneh lo a, a zinkawng a tawp zui nghal.

World number 1 hlui Srikanth pawh Lee Zii Jia nen minute 54 an inkhelh hnuah 21-19, 14-21, 11-21 in a chak lo. Tun dinhmunah Srikanth hi world number 20 a ni - Paris Olympic khel tur chuan world number 16 chin nih a ngai, infiamna khawmpui lian hmachhawn turin hmabak a la ngah.