Japan leh Iraq an chak chiang

Asian Cup 2023 group stage hmawr bawk a hnai a, round of 16 lut pawh a chiang chho zel - Iraq laka rin loh taka an tlawm hnuin Japan an insiamṭha lehnghal a, Indonesia chu 3-1 a hnehin Asian Cup round of 16 an lut.

Japan tan Ayase Ueda chuan goal hnih a khung a, Feyenoord striker hian minute rukna lekah ama penalty hlawhchhuah chu goal-a chantirin goal hmahruai a khung a, minute 52-naah a belhchhah bawk.

Indonesia tan Japan laka 'comeback' turin a harsa tawh tih a lang a, hun tawp nan minute hnih a la awm tihin Indonesia defender Justin Hubner chuan an lamah a tilut zui - Hubner hi Netherlands-a piang niin, Indonesia tana inlan a thlang a, Wolverhampton Wanderers tan a khel mek.

Japan hi 3-0 in an chak mai dawn niin a lang hman a, mahse, Belgian Pro League club Mechelen player Sandy Walsh chuan Indonesia tan hun pek belhah khung ve lehin, 3-1 in inkhel a tawp - Indonesia tan last 16 luh theihna a la awm a, nizan inkhela Kyrgyzstan-in Oman laka point an hlawhchhuah chuan pathumna tiṭha pali zinga telin last 16 an lut ang.

Match hmasa pahniha Indonesia leh Japan hneh a, last 16 lut chiang tawh Iraq-in match thum an khelhah hnehna an chang vek a, Nilaini zan khan Vietnam chu 3-2 in an hneh.

Iraq tan Japan laka goal hnih khungtu Ayman Hussein chuan goal hnih a khung leh a, Vietnam winger Khuat Van Khang chu first half hun pek belhah hnawhchhuah a nih avangin Vietnam hian player 10-in a tawp thleng an khel.

Vietnam hian Bui Hoang Viet Anh hmangin minute 42-naah goal hmahruai an khung hial a, mahse, minute sarih hnuah Khuat Van Khang chu hnawhchhuah zui niin, hei hi an chhiatpui.

Iraq tan Rebin Solaka chuan minute 47-naah si phurh sutin, Ayman Hussein chuan second half-ah hmahruaina goal a khung zui. Vietnam hian hun pek belhah Nguyen Quang Hai hmanga khung ve lehin an beidawng lo a, 2-2 in inkhel a tawp dawn niin a lang hman.

Mahse, Vietnam vanduai a kaltluang laklawh a, hun pek belh minute 12-naah penalty an chawi leh a, Ayman Hussein chuan goal-ah a chantir. Goal dang lut turin hun a awm tawh lo a, Iraq-in 3-2 in hnehna an chang.

Vietnam erawh an vanduai takzet - an match hmasa berah uiawm takin Japan chu 4-2 in an ngam lo a, Indonesia lakah 1-0 a tlawmin, Iraq lakah uiawm takin an tlawm leh ta. Match thumah chak nei lo mah se, an khelh danah hmasawnna a tel avangin an football hmabak a êng hle.