Manchester Derby-ah goal a lut lo

Inrinni zan Manchester Derby-in beisei a pha lo. Old Trafford-ah Manchester United leh Manchester City te goal awm loin an inhnehtawk. Theatre Of Dreams-ah inkhel hmuhnawm chhuah a ni lo a, chuti chung chuan Ole Gunnar Solskjaer erawh an khelh danah a lungawi.

Pep Guardiola-a'n derby hmachhawn tur zingah Sergio Aguero a telh lo. Argentine striker tel lo chuan Manchester City tlarhma a bil a, Inrinni zanah pawh a awm loh avangin tlarhma a bil dawn tih a lang.

Aguero hi Champions League-ah Marseille nen an inkhelh ṭumin a inlan a, goal a khung. Derby-ah erawh a pum lam (gastroenteritis) a nawmsam loh avangin telh a ni lo.

Manchester United-in hliam vangin Edinson Cavani chu squad-ah an telh bik lo a, player ṭha dang erawh an kim hle. City tan Kevin de Bruyne a inlan a, United lamah Bruno Fernandes leh Paul Pogba ten bul an ṭan dun bawk avangin an theihna thlir chuan inkhel hmuhnawm chhawp thei tur chu an ni.

Man City-in Marseille 3-0 in an sawp a, Man United-in RB Leipzig lakah goal thum an chhuah a, Old Trafford-ah pawh goal hmuh ngei a beiseiawm hle.

United tan midfielder Scott McTominay-a'n chance ṭha a nei a, Scottish midfielder hian Victor Lindelof ball tauh kawi chu 'inches' tlem te chauhin a tlawh fuh hman lo.

City forward Raheem Sterling pawhin Untied box chhungah ṭha taka a lakluh hnuah a ball pet chu Harry Maguire-a'n a dansak. Kevin de Bruyne-a'n fing takin Riyad Mahrez tan a pe a, Algerian winger goal khung tur hi keeper David de Gea-a'n a dansak. Brazilian forward Gabriel Jesus-a'n a hun ṭha neih goal zawnah a pet thei lo.

Second half ṭan aṭanga minute lina lekah Kyle Walker-a'n Marcus Rashford a pet a, United-in penalty hmuah an inngai. Amaherawhchu VAR hmangin ennawn a ni a, English forward hi a offside hman a nih avangin pawm a ni lo.

First half aiin second half a dul a, team pahnihin goal zawnah vawi khat ve ve chauh an pet. Kum thum chhunga a vawi khat nan Old Trafford-a derby inkhelah goal a lut lo.

Manchester khaw club pahnih hian season bul an ṭan tlai a, team dang aiin match khatin an khel tlem. Derby-ah team pahnihin point an hloh ve ve avangin an tla hniam.

United-in match 11 aṭangin point 20 an hmu a, pariatnaah an awm. City-in point 19 an hmu a, Solskjaer-a hote nen hian an khelh zat a inang.

Pep Guardiola hote hian Thawhlehni zan hian West Brom an hmachhawn dawn a, Man United-in Ningani zanah Sheffield United an tlawh ve bawk ang.

Pawisa thapna lam buaipuitute chuan Premier League manager zingah Ole Gunnar Solskjaer chu ban hmasak turin an dah a, derby result hian Norwegian manager hmalam hun hril tura ngaitu pawh an tam hle.

Amaherawhchu United-in an hmelma City an chelh takah chuan Solskajer-a dinhmun pawh a ziaawm hretah a ngaih theih. Ole Gunnar Solskjaer chuan, "Kan intluk tawk hle. Season liam ta khan kan hneh ngun zawk a, khami ṭum kha chuan counter attack hmang ṭangkaiin kan hneh. Tun ṭumah chuan ball chan tam leh inkhel thunun lamah hma kan sawn. Tun ṭum hi ka hnuaia Man City kan hmachhawn tawhah chuan kan khelh ṭhat ber a ni," tiin a sawi a, an khelh danah a lungawi.

Norwegian manager Solskajer thlirna hi a dikna chen a awm. Season liam ta kha chuan Man City-in Old Trafford-ah point thum hlawhchhuah ngei ngei an tum a, kuminah erawh Pep Guardiola hote an fimkhur tawh. Point hmuh loh theih tih hriain Man United hi counter attack theihna remchang an neih lohna turin an inveng.

Man City manager Pep Guardiola chuan, "Bul an ṭan ṭha a, keini lamin first half kan khar ṭha zawk. Chance vawi li vel kan nei a, United lakah chuan goal chance neih hi a harsa. Team ṭha tak an ni a, Old Trafford-ah kan khel a, Champions League khelh tur an nei tawh lo bawk. Player tlan chak an kawl avangin counter attack-ah an hlauhawm a, tun ṭumah erawh kan veng ṭha hle," tiin a sawi.

Manchester Derby

Ederson; Kyle Walker, John Stones, Ruben Dias, Joao Cancelo; Rodri, Fernandinho; Riyad Mahrez (Ferran Torres 66'), Kevin De Bruyne, Raheem Sterling; Gabriel Jesus.

Zack Steffen, Ilkay Gundogan, Bernardo Silva, Aymeric Laporte, Benjamin Mendy, Phil Foden.

David de Gea; Aaron Wan-Bissaka, Victor Lindelof, Harry Maguire (c), Luke Shaw; Scott McTominay, Fred, Paul Pogba; Bruno Fernandes; Marcus Rashford, Mason Greenwood (Anthony Martial 74').

Nemanja Matic, Alex Telles, Dean Henderson, Eric Bailly, Donny van de Beek, Juan Mata.