KHAWTHLIR

Kawlphetha awm dawn lo

Power & Electricity dept. chuan 33KV Maumual Sub-Station, 33KV Chawn­pui Sub-Station leh PTC 11KV line-ah January 27, Inrinni chawhma dar 10 aṭanga chawhnu dar 1 inkarah hna an thawk dawn a; Chaltlang Maumual, Chawnpui, Kanan Veng, Chanmari West, Chatlang Lily Veng, Bawngkawn, Bawngkawn Chhimveng, Ramhlun PWD Tlang, New Capital Complex, Upper Khatla, Tuikhuahtlang, Khatla Peter Street leh PTC-ah kawlphetha pek a ni dawn lo.

New Delhi-a R-Day-ah tel dawn

Horticulture dept. hnuaia PMKSY scheme, Micro-irrigation Per Drop More Crop-a hna thawk ṭha zuala thlan mi pakuate leh an kawppuite chu New Delhi-a Republic Day lawmnaa tel turin an kal a, special guest atan thlan an ni. Nodal officer L Lalhmingmawia Pachuau, Horticulture additional director hoin January 24, Nilaini khan Delhi an pan a ni.

AR-in hun hmanpui

Assam Rifles chuan kumina Republic Day (January 26) pualin January 24, Nilaini khan Ferrando Children’s Home, Durtlangah naupangte hun an hmanpui a, infiamna leh intihhlimna chi hrang hrang an tihpui.

Tawlhlohpuan bahtir

Tuirial bial-a ZPM Joint VC chuan Home minister K Sapdanga chu a hma­lakna an thlàwpzia leh hnungtawlh loa hma lam pana a kal zel theih nan nimin khan a pisaah tawlhlohpuan an bahtir a; an thlàwp tlat dawn thu leh thâ thawh a ṭul pawha an inhuam thu hrilh.

GST sawiho

Mizoram State Coor­dination Com­mittee on GST chu January 24, Nilaini khan Taxation Auditorium-ah an ṭhukhawm a, service sector hnuaia chhiah lâk dan tur leh sumdawngte'n GST dan an zawm ṭhat lehzual theih nan zirtirna tam zawk neih ni se, an ti.

CM leh MPSC

Chief minister Lalduhoma chuan nimin khan a pisaah Mizoram Public Service Commission chairman JC Ramthanga leh member Vanlalngaihsaka te a kâwm a; tun hnai kum hnih chhunga MPSC-in hmasawnna a neihte leh hmachhawpte a sawipui.