Joshua hmaah Pulev a ding zo lo

Bulgarian boxer Kubrat Pulev-a'n Anthony Joshua lakah a vaupung ti na viau mah se a tak ram a thlen meuh chuan eng ruai a ang lo a, round kuanaah Joshua hian Pulev a knockout. 

Nimin zinga inhnekah Joshua-a'n hnehna a chan tak avangin Tyson Fury nena inhmachhawn tura tih an nihna pawh a ri ring lehzual sawt a, boxing khawvel a 'hot' chho zel dawn. 

Kum 31 mi Joshua chuan, "Belt kawltu apiang chu hmachhawn ka duh a, chu chu Tyson Fury a nih chuan ka hmachhawn mai ang," a ti a, amah ang thoa British boxer hi a cho hle. 

Fury a ngawi mai mai bik lo. Social media lamah Joshua a chhang zui a, "Fight neih ngei ka duh a, ka duh takzet. Round thum chhungin ka knockout ang - Joshua knockout ka chak tawh a ni," a ti!

Heavyweight boxer ṭha ber zinga mi ni mah se Joshua chungah rinhlelhna a nasa a, tun hnai a result vang a ni - June 2019 khan rin loh takin Andy Ruiz Jr. lakah a tlawm a, khawvelin mak a ti. 

December khan Andy a hma-chhawn nawn a, Joshua hi tlawm leh ngat se chuan a career-a tawp tih theih deuhthaw tur a ni - mahse, British boxer hian hnehna a chang a, IBF, WBA leh WBO kawnghren a hloh tawh chu a nei let. 

Joshua fan-te lawm a la kim lo cheu - hnehna a chang ngei a, mahse knockout a ni tlat lo! Hei vang hian fan-ten Joshua chungah tun hma angin rinna nghah ngam an harsat a, Andy Ruiz aia ṭha zawk Pulev lakah an hlauthawng. 

Mahse, Wembley Arena-a mipui 1,000 hmaah Joshua-a'n a theihna leh thiamna a pholang a, hmuhnawm tak a ni - round tir aṭangin Pulev hian kawng tinrengah a khan lo a ni ber.

Joshua hmaa awm chu Fury a ni a, boxer pahnih hi an inhnek thei ngat a nih chuan heavyweight boxing-a kawnghren awm zawng zawng chu a chak zawkin an kawl dawn tihna a ni - a ngaihnawm dawn!

Vawi 25 inhnek a hmachhawna vawi 24 chak thei Joshua hi a fimkhur erawh a ngai dawn. Pulev ai chuan Fury a ṭha zawk tih chu tlang hriat a ni a, chumi piahlamah chuan a boruak 'ken' a lian dawn tih a chiang. 

Heng zawng zawng ngaihtuah chungin Joshua tan fimkhur a ngai dawn tih a lang a, a promoter Eddie Hearn chuan, "Boxing khawvela inhnek thlentir ngei ngai a ni a, British boxing-a inhnek ropui ber a ni ang," tiin Joshua vs Fury chungchang a sawi. 

Fury co-promoter Bob Arum chuan Joshua leh Fury an inhma-chhawn ngei theih nan hna a ṭan nghal tur thu a sawi a, boxer pahnih chu an inhnek a nih chuan, "Kum 1971-a Muhammad Ali vs Joe Frazier hnua inhnek ropui ber a ni ang," a ti - a ngaihnawm zel dawn.