Final-ah Jannik Sinner vs Daniil Medvedev

Djokovic hnehtu Jannik Sinner

Jannik Sinner chuan Australian Open neitu ang hiala sawi tawh Novak Djokovic a hneh! Italian tlangval hian nimin chhun khan Djokovic hi darkar thum leh minute 23 chhungin 6-1, 6-2, 6-7(6), 6-3 in a hneh a, a vawi khat nan Grand Slam final a lut.

Serbian star Djokovic-a'n Australian Open nomawi vawi 10 a chawi tawh a, major title a lak zat chu 24 a ni bawk - a record ṭha tak mai pahnih hi sawhngheh belhchhah tum mah se, a hmaah Sinner a lo din khawng tlat a vangin a tum ram a thleng ta lo.

Sinner a nghet

Vanglaini chhuak hmasaah khan, semifinal an khelh hma khan Sinner-a service ṭhatzia leh tun inelna neih laiah set a la hloh miah loh thu a inziak a nih kha. Djokovic lakah Italian tlangval hian a tir aṭangin inkhel a thunun hneh hle.

Set hmasa pahnih phei chu awlsam takin a la. Set thumnaah erawh Djokovic a rawn ṭang thar, inkhel kal lai ti muang luiin a tawnhriat a hmang a, tie break an khelh laia che fuh zawk niin set thumna a la, tun tournament atana Sinner-a'n set a hloh hmasak ber a ni.

Rod Laver Arena, Melbourne Park hi Djokovic-a'n a hrechiang em em a, set khat a lak takah chuan 'comeback' thei mai tura ngaihna pawh a lian hman. Mahse, set linaah Serbian star hian a service a hum thei leh tlat lo, a tan thawh leh ngaihna a awm tawh lo.

Kum 36 mi Novak hian a khingpui service a chhuhsak thei lo pawh a ni satliah lo, break point pawh a hmu miah lo! A zawna match 33 a chak tluan tawhna tournament aṭangin mittui nen a liam hun a thleng ve ta a ni.

Tawp tum lo

Chak lo mah se Novak Djokovic chuan tawp mai la tum lo, kum 36 mi niin a vanglai liam ve mek mah se tennis inelna lian leh sangah tun aia ṭha zawka inlan leh theih ngei a la beisei - rilru paukhauh leh luhlul a nihna a la danglam lo.

Australian Open vawi 10 champion tawh Djokovic chuan, "Sinner khan final luh a phu zawk, a bik takin set hmasa pahnih kha ka khel chhe lulai hle a ni. Grand Slam match ka khelh ve tawh hoah chuan a chhe ber a la ni hial ang.

"Tunah chak lo mah ila ka tlahniam ta duai tihna a ni ngawt lo a, ka tawpna tur a inṭan tihna pawh a la ni bik lo. Grand Slam dang hmachhawn tur a la awm bakah Olympic awm kum a ni bawk, tunah hian season bul kan ṭan chauh a ni," a ti.

Djokovic hnehtu Sinner hi kum 22 mi chauh a la ni a, player pahnihte kum inthlauhna kha 14 ngawt a ni. Player chhuak thar ṭha tak tak an awm zel a, vanglai pel mek Novak tan pawh tun hma aiin nomawi lian tham chawi a harsa chho dawn niin a lang.

Tlawm duh lo Daniil Medvedev

Australian Open semifinal hnuhnung zawkah Daniil Medvedev-a'n comeback ropui a rawn lantir a, Alexander Zverev laka set hniha a hnufual hnuah a tho chhuak. Russian star Medvedev hian 5-7, 3-6, 7-6 (7-4), 7-6 (7-5), 6-3 in hnehna a chang a, a vawi thum nan Australian Open final a lut.

Kum 27 mi Medvedev hian Australian Open nomawi hi a la chawi ngai lo a, chutihrualin tun hi a tan hun ṭha a ni. Final hi January 28, Pathianni chawhnu dar 2:00 hian Jannik Sinner nen an khel ang.

Player theihna sang tak nei, mahse Grand Slam la champion ngai lo Zverev-a'n AO 2024 nomawi chawi ngei a tum tih a lang. German star hian 7-5 a set khatna a lak hnuah 6-3 in set hnihna a la a, final a hnaih tawh hle.

Mahse, Medvedev-a'n tha a thlah bik lo. Set thumna leh linaah hian player ṭha pahnih hian an service an hloh lo ve ve. Ṭum hnih tie break khelh a ni a, Russian player Medvedev a vannei zawk. Zverev thiamzia pawh a lang a, a vanduai deuh thung.

Set nganaah Medvedev-a'n Zverev a chau tawh tih a hria a, a dawhthei zawkah a ṭang. German star Zverev-a'n 2-2 a nih laiin a service a hloh a, heta a unforced error a neih hi a pawi takzet. Medvedev-a'n 3-2 a hma a hruai hnuah a hawi kir tawh lo a, a tawpah Zverev-a service laksak lehin 6-3 in set tawpna ber a la.

Inkhelh banah Medvedev chuan, "Set khatnaah kan khel ṭha tawk lo ve ve. Set hnihnaah kha chuan a service lak ngaihna ka nei lo hrim hrim. Set thumnaah khan ka infuih a, tun set hi ka lak loh chuan ka tla dawn. Chuvangin point zawng zawng lak vek tumin theihtawp ka chhuah a, ka vannei tel bawk a ni," tiin a sawi.