Jurgen Klopp a chhuak dawn!

Liverpool manager Jurgen Klopp chuan tun season tawp rualin Anfield a chhuahsan tur thu a sawi, kum 2026 thleng contract nei mah se Reds tan a theihna zawng zawng a hmang zo tawh niah a inngai.

German manager hian kum 2015 October thla aṭang khan Liverpool hi a enkawl ṭan. Reds tan Champions League nomawi a chawi a, kum 30 teh meuh an nghah tawh Premier League nomawi a chawi pui bawk - Kop hoin an theihnghilh tawh ngai lo ang.

Kum 56 mi Klopp chuan, "Nikum November thla khan ka chhuah tur thu hi club thuneitute hnenah ka sawi tawh, tun huna ka chhuah tur thu sawi hian mi tam tak a barakhaih hle ang tih ka hria, mahse kei pawhin han sawifiah vak dan ka hre lo.

"Liverpool hi ka ngaina a, club mai bakah khawpui leh a mi chengte, club ṭan tu fans zawng zawng te ka ngaina hle, Hetiang hna hi chu ka dam chhungin ka thawk thei tawh ngai lo ang tih pawh ka hria," a ti.

Klopp kaihhruaina hnuaiah Reds hian tun season Premier League-ah pawh hma an hruai mek, match 21 aṭanga point 48 hmuin champion lai Manchester City aiin point ngain an sang zawk.