Sabalenka hmaah Zheng

Australian Open hmeichhe singles final chu vawiin chawhnu dar 2:00 hian khelh a ni dawn, champion lai Aryna Sabalenka hmaah Chinese nula Zheng Qinwen a ding dawn. Inkhel hi Sony Sports 3-ah live a en theih a ni ang.

Tennis season khat chhunga Grand Slam hmasa berah hian, hmeichhe player ten nomawi humhim an harsat ṭhin. Victoria Azarenka (2012 leh 2013) hnuah a zawna champion thei an la awm leh ngai miah lo a ni.

Azerenka ang bawkin, amah anga Belarus mi ni bawk Sabalenka chuan a hniak hnung rawn zui theihna remchang a nei mek. Remchang nei mah se a khingpui tur Zheng-i hi seeded 12-na ni phak a ni a, inelna a hman ṭhat bawk em avangin thil awlsam a ni dawn lo.

Kum 25 mi Sabalenka chuan, "Grand Slam final vawi thum ka khelhna tur a ni a, chiai loin ka hmachhawn theih ngei ka ring. A nihna takah chuan a vawi khatna te kha ka ngaihtuah let a, hmanhmawh leh helhhawlh reng reng khan hun ka hmang.

"Tunah erawh a vawi thumna tur a ni tawh a, eng inkhel pawh hmachhawn turin ka inpeih," a ti. A tumpui tur Zheng tan major tournament final hmasa ber a ni dawn a, a boruak tawn tur a hriatthiam pui - a rilru a chhaih pawh a ni thei bawk.

China nula Zheng-i'n final kalkawngah player langsar tak a hmachhawn lem lo, chutihrualin semifinal-a a hneh tak Dayana Yastremska-i kha tun inelna neih laia player hmuhnawm zinga mi a ni phak a, ani hneh kha thil awlsam a ni lo ang.

Kum 21 mi Zheng chuan, "Final hi chu match harsa tak a ni dawn, tunlai hmeichhe player zingah chuan Sabalenka hi ball vuakna berte zinga ni a, a service a ṭha em em bawk, player ṭhain an neih tur ang hi a nei kim.

"Mite chuan chak lo zawk turah min ngai ang tih pawh ka ring, mahse hei leh chen hi ka thlen tawh avangin ka beiseina hi thamral tir mai ka tum bik lo," a ti a, a vawi khat nan champion ngei a tum ruh hle.